Алгыстаах маас хаһаайына
GrandDad  -    3199
image
Ответов 5
  • GrandDad
    6 октября 2021
     

    Сахаларга былыр-былыргыттан ааттаах-суоллаах улахан ойууттар, удаҕаттар олорон ааспыттарын туһунан элбэхтик ааҕабыт, истэбит даҕаны. Билигин күннээҕи олохпутугар оннук дьонтон сыдьааннаах, эмиэ ураты дьылҕалаах, киһи ылла да тута ылыммат, өйдөөбөт ураты дьоҕурдаах дьон баалларын билэбит. Маннык улуу ойууннартан силистэнэн-мутуктанан кэлбит дьон саастара араас. Эдэриттэн кырдьаҕаһыгар тиийэ, дьахтар, эр киһи да буолуон сөп. Ол эрээри кэмэ кэллэҕинэ, сааһыттан тутулуга суох, баар баара өтөн, бу дьон араастаан ыалдьан эттэтии диэн эмиэ туспа туругу ааһан, билигин дьоҥҥо көмөлөһө, кинилэри эмтээн, алҕаан, кыһалҕаттан, ыарыыттан босхолуулларын туһунан истэн билэбит. Биир оннук улахан төрүттэрдээх киһи билигин Нам Никольскайыгар олорорун туһунан истэммин, дьон нөҥүө телефонун ыламмын, кэпсэтэ сырыттым.

    Александр Саввич Эверстов Нам II-с Хомустааҕыттан төрүттээх 5 оҕо аҕата уонтан тахса сиэн тапталлаах эһэтэ. Эдэр сааһыгар Уус-Алдаҥҥа Партизан Заболоцкай аатынан совхозка, төрөөбүт улууһугар Намҥа өр сылларга ыанньыксыттаабыт, субай сүөһү бостуугунан үлэлээбит. 2015 сыллаахха эмискэ инсульт ыарыы охсон, орон-тэллэх киһитэ буолан хаалбыт. Ити сыттаҕына, түүлүгэр арааһы көрөр, урукку олоххо төннөр, өлбүт дьону илэ көрөн кэпсэтэр эбит.

    Түөрт сыллааҕыта Никольскайга Алдантан Айыы кыыһа Айыына диэн эмчит кэлэн, олохтоохтору эмтээн, хаампат оҕону хаамтаран, дьону-сэргэни улаханнык сөхтөрбүттээх. Александр тастыҥ убайа Иван Егорович, бу эмчити ыалтан ыалга таһааччынан, арыаллааччынан сылдьыбыт. Түгэн көстүбүтүгэр эмчиккэ быраата улаханнык ыалдьан, орон киһитэ буолан сытарын туһунан кэпсээбит. Онуоха Айыы кыыһа Айыына “Ылсыахпын сөп” диэн сөбүлэҥин биэрбитигэр үөрэ-көтө Эверстовтарга тиэрдэн биэрбит.

    Ыраахтан кэлбит ыалдьыт “Бу дьиэҕэ миигиннээҕэр күүстээх киһи сытар, кини көҥүл биэрдэҕинэ эрэ киирэбин” диэн тута киирбэккэ, массыынаҕа олорбут. Онтон ааны өҥөйөн туран, көҥүл ылан баран, дьиэҕэ дьэ киирбит. Александр биэс сыл ороҥҥо сыппыт киһи эмтэнэ охсон, үтүөрэн, икки атаҕар туран, хааман барар баҕата ханна барыай?

    Эмчит киирэн хомус тардан, уот оттон, чуораанчыгын тыаһатан, 9 тумуктаах дүҥүрүн таһааран “Мин эйигин эбэҥкилии эмтиэҕим!” диэн баран, дьэ кыыран саҕалаабыт. Ити курдук эмчит сиэри-туому толорон , тахсарыгар: “Эн наһаа күүстээх энергияҕын кыайбакка таттарар, ыалдьар эбиккин. Дьону эмтээ! Мин эйигин Үрдүк Айыыларга чугаһатан биэрдим” диэн алҕаан баран, тахсан барбыт. Ити түүн Александр түүлүгэр суор буолан көппүт. Сур бөрөлөр, хара үөр ыттар эккирэппиттэр. Ити ойууттар сүрдэрэ буоларын Александр сэрэйбит.

    Дьылҕа ураты суолун тутуһуу

    Итинтэн ыла Александр олоҕо уларыйан барбыт. Билигин дьиэ иһигэр хаамар, номнуо Саха сирин араас муннуктарыттан кыһалҕалаах элбэх дьон кэлэн эмтэнэн, туһанан барбыт.

    .– Түүлбэр маҥан баттахтаах, маҥан баккы ырбаахылаах, маҥан ыстааннаах, мас торуоскалаах оҕонньор кэлэн “Мин аатым Ньыыкан” диэбитэ. Онон эмтиирбэр сүрүн сүбэһиппинэн, Үөһээ-Бүлүү кырдьаҕаһа Ньыыкан оҕонньор буолар. Кини ыйан биэрбит маһын күлүнэн маас оҥоробун. Кэргэммэр Натальяҕа түүлбэр көстүбүт маһы ойуулаан, ыйан биэрэбин. Тапталлаах кэргэним ону булан аҕаллаҕына, ол маһы уматан, күлүн таһаарабын, арыыга буккуйаммын, анабыл маас оҥорон ыарыһахха биэрэбин. Араас кыһалҕалаах дьон кэлэн бараллар. Тыҥата ууламмыт дьахтар кэлэн эмтэнэн барбыта. Үөһээ-Бүлүү Оҥхойугар олорор киһи эрийэн, “Бааһы эмтиир үһүгүн” диэн атаҕын хаартыскаҕа түһэрэн ыыппыта. Бу киһи сототугар эт хаалбатах, сүһүөхтэрэ көстө сылдьаллара, амырыын хартыына этэ. Онуоха мин түүлбэр улахан убайбын Ньыыканы ыҥыраммын, көмө көрдөөммүн, сүбэлэтэммин, көҥүл ыламмын, ити дьыалаҕа ылсыбытым.

    Түүлбэр суордары, тураахтары кытта кэпсэтэбин. Энергиябын бу алгыстаах мааспар биэрэбин. Билигин Аан дойду үрдүнэн коронавирус дьаҥа туран, алдьархай үгүс дьон олоҕун илдьэ барда. Мин тыҥаны ырааһырдыыга маас оҥороммун, бу мааһы соттон дьон туһанан эрэр дии саныыбын. Төрөөбүт дойдубар II-с Хомустаах олохтоохторун көрдөһүүлэринэн 1 киилэ маас оҥорон ыыппыппын,үллэстэн тутта сылдьаллар. Ити дьаҥҥа ылларан балыыһаҕа сыппыт бэйэм билэр дьоммор маас оҥорон ыыппытым. Күҥҥэ иккитэ алгыстаах мааспын соттон, тыҥалара ырааһыран, доруобуйалара көнөн, балыыһаттан түргэнник тахсыбыттара.

    Дьон миигин ылынара араас. Оннооҕор бэйэм оҕолорум итэҕэйбэт курдуктар. Дьиэ иһигэр торуосканан сылдьабын. Онон миигин саамай өйдүүр, көмө, тирэх буолар киһим кэргэним, Натальям. Аҕыйах сыллааҕыта кини улаханнык ыалдьа сылдьыбыта. Оһоҕоһунан моһуоҕуран, туппат буолан, эрэй бөҕөтүн көрбүтэ. Онно эмиэ сөптөөх маһы буллаттаран, ол күлүн сиэтэммин, аҕыйах хонугунан ити кыһалҕаны туораппытым. Дьоҥҥо көмөлөһөр баҕам улахан. Дьон ыарыыттан босхолонон, махтанан эрийдэхтэринэ олус үөрэбин, астынабын.

    Тумса Хааннаах Суор Ойуун түүллэрэ

    Түүлбэр өбүгэлэрим кэлэн Тумса Хааннаах Суор Ойуун диэн аатынан сүрэхтээбиттэрэ. Түүлбүнэн туох буолуохтааҕын билэбин. Дьону эмтиирбэр, кэлбит киһи үтүөрэригэр өбүгэлэрим көмөлөһөллөрүгэр көрдөһөбүн.

    Бу Аан дойдуну аймаабыт ыарыы, дьаҥ кэлэригэр маннык түүлү түһээбитим. Арай түүлбэр күүстээх тыал, силлиэ түстэ, мас-от бөҕө суулунна. Түүлгэ тыал-куус түһэрэ – ыарыы бэлиэтэ. Арай улахан да улахан нөҥүөтэ көстүбэт күөл кытыытыгар балык бөҕө өлө сытар. Мин өлбүт балыгы маһынан буккуйан көрөбүн. Балыктар муус маҥан үөн ыспытыттан өлбүттэр эбит диибин. Дьэ, ити бу кэлбит дьаҥы биттээбит түүл буолуон сөп.



    Алгыс баһа сыаланнын!

    Тумса Хааннаах Суор Ойууну кытта кэпсэтэн бараммын, киниэхэ сылдьан эмтэммит дьон телефоннарын ыламмын, салгыы ыйыталастым, кэпсэттим.

    Ульяна Соркомова, Муома улууһун Буор Сыһыы бөһүөлэгин олохтооҕо:

    – Мин Дьокуускайга балыыһаҕа сытаммын, Намтан сылдьар киһиттэн Александр туһунан истэммин, телфонун ылан кэпсэтэн, кэргэмминээн тахсан эмтэммиппит. Александр Саввич биһигини от уматан ыраастаан, буруо таһааран баран илбийэн саҕалаабыта, салгыы массажтаабыта. Биһиги хоту дойду олохтоохторо үгүспүт атахпытынан, сүһүөхпүтүнэн эрэйдэнэбит. Мин атахпынан хаампат буолан хаалабын. Бу эмчиккэ сылдьыахпытыттан испит-үөспүт үлэтэ тубуста, тобугум да ыарыыта намыраата. Иһэргэ диэн от уонна алгыстаах мааһын биэрбитинэн сотто сылдьабыт. Дьэ, абыраллаах киһи. Биһиги ыал махталбыт улахан.

    Прасковья Охлопкова, Нам:

    – Мин Александры кытта оҕо сааһым бииргэ ааспыта. Коронавирустаан, Александр эдьиийин кытта бииргэ балыыһаҕа сыппыппыт. Сэниэм суох, аһыахпын баҕарбат, муннум, сыты билбэт, айаҕым амтаны билбэт буолан балыыһаҕа киирбитим.

    Александр алгыстаах мааһын оҥорон ыыппытын, сарсыарда, киэһэ түөспүт, тыҥабыт туһаайыытынан соттор этибит. Медиктэр биллэн турар, анаммыт эмтэн ураты ону-маны эбии иһэри, соттору сөбүлээбэттэр. Онон саҥата суох сотто сырыттыбыт. Мааһы туттубуппут иккис күнүгэр, арай сөтөлүннэрэн, чалахай кэлэн саҕалаата. Онтон үһүс күн кэнниттэн элбэх хойуу чалахайы таһаараммын, сирэйим, хараҕым сырдаан, сэниэлэнэн, аһыыр буолбутум. Хас да хонон баран, сөтөллүбэт буолан хааллым. Көхсүм кэҥээн, хараҕым сырдаан, КТ аппаракка түһэрэ иттилэр. Тыҥам ырааһыран, үтүөрэн, балыыһаттан эрдэ тахсыбытым. Онон алгыстаах маас улаханнык туһалаабыта. Александрга махтанан тураммын, салгыы даҕаны элбэх дьоҥҥо көмө,тирэх буоларыгар баҕарабын.

    Франческо Сметанина, Мэҥэ-Хаҥалас:

    – Мин Намҥа олорор Александр Эверстов туһунан истэммин, телефоннаһан бараммын, эдьиийим көрдөһүүтүн толорон, бу эмчиккэ тахса сылдьыбыппыт. Эдьиийим балыыһаҕа сүрэҕинэн, наһаа өр сытан, тыҥатыгар уу мустан, сыл иһигэр эмискэ дьүдьэйбитэ, ырбыта. Александр эдьиийим иһэригэр эмп оҥорбута уонна тыҥатын сотторугар маас биэрбитэ.Киниэхэ сылдьан баран, эдьиийим санаата көтөҕүллэн, ый курдук эмин туһаммытын кэннэ, бүөрэ үчүгэйдик үлэлээн, тыҥатыгар уу мустубат буолан, быдан чэпчээбитэ. Онон аанньал курдук саныыр Александрбытыгар доруобуйаны, инникитин даҕаны кыһалҕалаах дьоҥҥо айылҕаттан иҥэриммит дьоҕурунан көмөлтө буола турдун! диэн баҕа санаалаахпыт.

    Владимир Андреев- Үөһээ-Бүлүү Оҥхойун олохтооҕо:

    — Миэхэ быраастар былырыын тропическая язва диэн диагноз туруорбуттара. Атаҕым эмискэ бааһыран, этэ баранан барбыта. Икки сылы быһа Саха сирин араас эмчиттэригэр сылдьан, көмө көрдөспүтүм, эмтэнэ сатаабытым даҕаны, мин ыарыыбын кыайбатахтара. Онтон дьонтон Намҥа бааһы эмтиир айдарыылаах киһи олорорун истэммин, Александрга эрийэ сылдьыбытым.Онуоха эмчитим миигин тута ылымматаҕа. Онтон хас да хонон баран эрийэн, “Биир дойдулааҕын Ньыыкан оҕонньор түүлбэр кэлэн көҥүл биэрдэ, эмтээ, кыайыаҥ” диэтэ диэн үөрдүбүтэ. Кылгас кэм иһигэр бааһым сэтэрээн, үөһэ тахсан испитэ. Онуоха Александр икки атахпын быстарарбар сүбэлээбитэ. Эппэрээссийэм кэнниттэн алгыстаах мааһын оҥорон ыыппыта. Онон быһыллыбыт атахтарым оннуларын соттоммун, кылгас кэм иһигэр оһон, билигин дьиэм иһигэр кэлээскэнэн холкутук сылдьабын. Кэлээскэбэр бэйэм тахсан олоробун. Протез олордор күннэрин күүтэбин.

    Дьиҥэр, эрдэ ыарыы буулаабытын кэннэ тута Александр Эверстовы кытта билсибитим буоллар, кыратыгар кыайыа эбит дии саныыбын. Билигин күннэтэ билсэ олоробут. Турукпутун ыйыталаһар, сүбэлиир. Кинини кытта билсибиппин, дьылҕам бэлэҕинэн ааҕабын….

    Дьэ, ити курдук, биһиги хаһыаппыт бүгүҥҥү ыалдьытын ураты дьылҕалаах, үөһээлэртэн норуотун, омугун араҥаччылыыр аналлаах айыллан кэлбит Александр Эверстов- Тумса Хааннаах Суор Ойууну кытта билистигит. Киһи киһи араас. Онон сорох дьон итэҕэйиэххит суоҕа. Ол эрээри, ыар ыарыы ыган кэлбитигэр, алгыстаах маас өрүһүйбүт түбэлтэлэрэ элбэхтэр эбит.



    Екатерина Бястинова.

    Статью посмотрели: 14 299
    22 декабря 2020 в 14:29

    1
  • GrandDad
    6 октября 2021
     

    image

    0
  • Omo5oi_Baai
    Omo5oi_Baai
    Ветеран
    6 октября 2021
     

    image

    1
  • Omo5oi_Baai
    Omo5oi_Baai
    Ветеран
    6 октября 2021
     

    https://sakha-pechat.ru/algystaakh-maas-khaһaayyna/?_utl_t=wh Алгыстаах маас хаһаайына - Забота-Арчы

    1
  • Omo5oi_Baai
    Omo5oi_Baai
    Ветеран
    12 ноября 2021
     

    image

    1
Авторизуйтесь, чтобы комментировать
Ваши данные будут надежно защищены и не будут переданы третьим лицам
Обратная связь