Уважаемые пользователи, форум с 11 мая 2020 года объединился с другими республиканскими форумами под новым названием "Республика".
По этой ссылке добавлять новые сообщения невозможно. Все прежние темы с обсуждениями останутся доступными для чтения.
Добро пожаловать на объединенный форум "Республика"!
7 лет на форуме Автор 3 уровня Топ пользователь Все
Награды
7 лет на форуме
7 лет на форуме
Автор 3 уровня
Автор 3 уровня
Топ пользователь
Топ пользователь
5000 просмотров
5000 просмотров
Дойдум форумугар тохсус киэһэ.
  4295
Доҕор.
Суол кытыытыгар турар чайнойга УАЗ микроавтобус кэлэн тохтоото.
- Киирэн аһыы туруҥ. Мин заправланан кэлиэм – диэн суоппар тиэйэн иһэр дьонугар дьаһалымсыйда.
Дьон массыынаттан түһэн, араас уотунан күлүмүрдүү угуйар, чайной диэки хаамыстылар. Биир эдэрчи киһи хоонньуттан, биир икки ыйдаах курдук, ыт оҕотун таһааран сиргэ ыытта. Онтуката түһээт төбөтүн буккуйа түһээт аан иннигэр чохчойон барда. Бэйэтэ сиэбиттэн табаах таһааран “бусхатан” барда. Ол икки ардыгар эмиэ биир массыына кэлэн дьон бөҕө кутулла түстэ. Били муҥнаах чэпчээн үөһэ тыынна уонна ас сытын ылан ол-бу диэки хантаарыҥнаата. Онтон боруота аннынан олбуорга “сылыпыс” гынна. Хаһаайына ону көрбөккө хаалла.
Иккис массыына дьоно аһыы киириитэ дьэ өйдөөн көртө ыта мэлигир. Дьэ сүүрэлээһин саҕаланна. Чайнойга сүүрэн киирдэ. Ыта суох! Таһырдьа сүүрэн тахсан ыҥыран көрдө, иһиирдэ. Ыт суоҕун курдук – суох! Онтон өй ылан төгүрүйэ сүүрэлээтэ. Көстүбэтэ. Ол икки ардыгар массыына кэллэ, дьон аһаан таҕыста. Бары ыҥыра-ыҥыра көрдөөн көрдүлэр. Чайной үлэһиттэрэ тахсан олбуор иһин эмиэ көрдүлэр. Ыт халлааннаан да көппүтэ, сирдээн да тимирбитэ биллибэт.
- Эн барсаҕын дуу? Хаалаҕын дуу? Биһиги айанныа этибит – суоппар ыксатар.
- Ээ, чэ хааллын. Барсабын. Куораттан да атыны булар инибин. Булчут ыт оҕото этэ да буоллар...
Массыына Долгуйар куорат диэки барылата турда.
Ответов 25
  • Хомустан
    16 июня 2015
     

    Ыт оҕото боруота анныттан чайной иннигэр баар буолла. Ол-бу диэки сытырҕаан олоотоон көрдө. Төттөрү-таары сүүрэлээн баран төттөрү олбуоругар киирэн хаалла.
    Оппуонньа алааска киирээри сапыраапкаҕа кэлэн тохтоото. Бу кус сезона аһыллан тыраахтарынан кустуу баран иһэр быһыыта. Сопхуос ыһыллыбыта быданнаата. Онон Оппуонньа иллэҥнээх ыал оҕото буоллаҕа эбээт. Ыал оҕото буолан – бэйэтэ биэнсийэтигэр чугаһаабыт аҕым киһи. Кыыдааннаах кыһын бүтэн бэйэтэ-бэйэтигэр уоппуска бэринэн сылдьар.
    Оппуонньа тыраахтарыттан түһэн сапыраапка бэстэлиэтин бааҕар угаат харчытын төлүү “хаадьаҥнаата”. Арай каассаҕа чугаһыырыгар биир сырдык өҥнөөх ыт оҕото кэлэн атаҕар ииллэ түстэ.
    - Сүүрбэ. Ноо, бу хайаларын ытай? – ыт оҕотун сэргии көрөн туран.
    - Маарыын биир такситтан ыт оҕото сүттэ диэн айдааран эрэллэрэ. Онтон булбакка бартара. Баҕар ол буолуо – сапыраапшик харчытын ааҕа-ааҕа.
    - Баҕар маннааҕы да буолуо. Чайной помуойатынан аһаан ыт бөҕө бу дойдуну буулаата.
    Оппуонньа ыт оҕотун саба харбаан ылан эргим-ургум туппахтаата.
    - Атыыр эбит. Син боруодалаах ыт курдук көстөр. Уонна мантыкаҥ ошейниктаах сылдьар эбит дии.
    - Ээ оччоҕо били сүппүт ыттарын оҕото буолуо.
    - Хата мин ылыам ээ. Ытым бу кыһын өлөн хаалта.
    - Ыл-ыл! Аны кэлэн хаһан ирдэһиэхтэрин баран. Манна ыттар да тутан кэбиһиэхтэрэ – сапыраапшик дьэллэмсийэр.
    - Хайа доҕоор ким диэҥҥиний, миигин кытта барсаҕын дуо? – Оппуонньа ыт оҕотун утары тутан туран.
    Биирдэрэ тылын быктара-быктара, кутуругун эйэҥэлэтэр. Ыраас баҕайы харахтарынан уун утары көрүтэлиир.

    0
  • Хомустан
    16 июня 2015
     

    - Дьэ доҕоор ааппыт суох быһыылаах ээ, чэ кэлин да толкуйданыллыа – диэтэ да Оппуонньа ыт оҕотун кууспутунан тыраахтарын диэки барда.
    Сапыраапкаланан баран чайнойга киирэн миин оҕото одноразовай иһиккэ куттаран тахсан ытын оҕотун аһатта.
    - Кыргыттаар били маарыын ыт оҕото сүтэрбит уол кэллэҕинэ миигин ыйан ыытаарыҥ – диэн этэн баран алааһын диэки тэптэрэ турда.
    Аттыгар сиденньэҕэ топпут, иһигэр сылаас киирбит ыт оҕото токуллан сытар. Тугу эрэ түһээн ыҥыргаан ылар.
    Оппуонньа өр гыммакка үүтээнигэр элэстэтэн тиийдэ. Быйыл хаар аҕыйах буолан улахан бадараан да суох. Кыра хаар уута баара тыалыран – кууһуран көтүтэн кэбиспитэ.
    Тиийбит сирэ Арыылаах диэн улахаан да улахан алаас. Ортотугар улахан тиит арыылаах. Уонна үс түөлбэлээх. Төгүрүччү хатыҥ чараҥ. Сайын от-мас силигилээн турдаҕына көрүөҥ этэ! Астык да астык көстүү!
    Оппуонньа үүтээнэ алаас хоту өттүгэр, ортоку эбэ кытыытыгар хатыҥ чараҥ иһигэр баар. Кэлиҥҥи кэмҥэ алааһы төгүрүйэ үүтээн элбээн турар.
    Тыраахтарыттан түһээт түбүк бөҕөҕө түстэ. Үүтээн дьаһала, сэп-сэбиргэл бэлэмэ, ас-үөл астаныыта. Соҕотох киһиэхэ элбэх үлэ. Ол сылдьан булумньутун умнан кэбистэ. Онтон аһа буһан остуолугар олорон иһэн дьэ тсанаата.
    - Арба, кыыллаах этим дуу! – диэн саҥа аллайаат тыраахтарыгар ыстанна.
    Били кыыла аанын арыйбытыгар биирдэ уһугунна. Тыыллаҥнатар бокуой биэрбэккэ харбаан ылан сиргэ олордон кэбистэ.
    Ытын оҕото сиргэ түһээт ииктээн барда. Дьыалатын ситэрээт Оппуонньа диэки утары көрбүтүнэн олорунан кэбистэ.

    0
  • Хомустан
    16 июня 2015
     

    - Дьэ доҕор аатыҥ ким диэний? Этэн биэрбэт буоллаҕыҥ дии – Оппуонньа ытын иннигэр олорон имэрийэ-имэрийэ.
    - Ким диэтэххэ сатаныай, ээ, чэ Доҕор да диэххэ. Доҕор диэн аат үчүгэй буолбат дуо? Булумньу иҥин диэн сатамдьыта суох курдук ээ. Эн миэхэ доҕор буолуоҥ буолбат дуо? – ыта тылын быктаран Оппуонньа илиитин салаан ылла.
    - Арба даҕаны, бу моойторуккун устан кэбиһиэххэ. Манна эмиэ тоҕо баайдахпыный – дии-дии ытын ошейнигын устан ылла.
    - Бай мантыкаҥ суруктаах эбит дии. Тохтоо доҕор, ачыкыланнахха эрэ ааҕыллыыһык дии – дии-дии ачыкытын хостоото. – Хайа доҕор бу да буоллар ааттаах-суоллаах, чыыннаах-хааннаах эбиккин дии. Сибирскэй лайка оҕото диэбиттэр, аата – Мохсоҕол. Ээ чэ биһиги Доҕор диэтэхпитинэ сөп ини.
    Доҕоро уун-утары көрөн олордо.
    Оппуонньа Доҕорунаан сып-сап аһаан, тэринэн, күөл кытыытыгар налыыга тахсыбыт ууга олорордуу оҥостон, тэбиннилэр.
    Урут манна саас аайы олорооччу. Сорох дьыл үрэх аһаҕас буоллаҕына кураанаҕы кууһааччы. Оччоҕо онно-манна баран олорооччу. Быйыл үрэх сабыылаах. Онон уулааҕа чахчы. Манан урукку кэмнэргэ кус сыбыытаан биэрэрэ. Оппуонньа да син сигийэр этэ. Эбэтэ кураанах таһаарбат буолара. Оннук күүстээх ытааччы да буолбатар – дьон тэҥэ син ытар.
    Сэрэйбитин курдук налыыта ууламмыт. Тэйиччи, эмиэ налыыга,онно-манна дурдалар багдаһан көстөллөр. Сөргүтүллүбүттэрэ ыраахтан көстөр. Күөл улахан аҥара дьынданнан көрө сытар. Арай ортотугар муус көҕөрөн көстөр. Хойутуу олорор, үрэх ааһар, көлүччэтэ эмиэ дьында. Аны аҕыйах күнүнэн үрэх уута сайгыыр ини.
    - Доҕор биһикки манна олоруохпут. Эбэбит быйыл да кураанаҕы куустарбат ини – Оппуонньа уутун көрөн туран.

    0
  • Хомустан
    16 июня 2015
     

    Эргэ дурдатын өрө тардан, көннөрөн олорордуу оҥостон барда. Доҕоро тилэх уопса сылдьар. Сороҕор ууга түһэн ыйылаан ыллар да саараама хаалсыбат. Чаас курдук бодьуустаһан дурда бэлэм буолла. Аҕыйах мончуук киллэрбитин кэһэ сылдьан түһэртээтэ.
    - Бээ-рэ, чаһыы төһө буолта буолла? Ээ эрдэ эбит. Кыратык олоро түһүүм. Онтон тахсан аһаан баран олорордуу оҥостон киириллиэ – диэтэ да дурдатыгар киирэн олорунан кэбистэ. Доҕоро аттыгар сытаат утуйбутунан барда. Муннун тыаһа ырааҕынан буола түстэ. Сороҕор түһэээн ньаҕыйан иҥин ылар. Атахтара эмиэ эйэҥэлии түһэр.
    Оппуонньа чаас курдук олордо да тылбыйар кынаттааҕы көрбөтө. Арай сотору-сотору тураахтар халаахтаһан ааһаллар. Дойдуларыгар кэлэн үөрүү-көтүү бөҕө быһыылаах. Ханна эрэ чугас, чараҥҥа, уйа туттубуттар быһыылаах. Иллэрээ сыл үүтээнин аттыгар, ол иннинэ тыы тахсарга туттубуттара. Бу да сырыыга аһары ырааппатылар ини.
    Аҕыйах үөрдээх кус түһүөх курдук “суугунаһан” кэлэн баран төттөрү ханарыһан чараҥ үрдүнэн “элэс” гынан хааллылар.
    - Чөркөөкүлэр! Чэ, бэйи “суугунаһан” көрүҥ! Киэһэ Доҕор биһикки кэпсэтиэхпит – диэн баран Оппуонньа хомунан үүтээнигэр таҕыста.
    Доҕоро кэнниттэн саппай уопсан ыйылыы-ыйылыы тэбинэ турда.
    Дьиҥэр ити кустар син киһи санаата тиийэр сиринэн аастылар ээ. Оппуонньа бастакы кустары мээнэ үргүтэ олоруон баҕарбат. Ол иһин тэргэнин тыаһаппакка хаалла. Түспүттэрэ буоллар “кынчайан” көрүө этэ.
    Киэһэ сааскы күн саҕахха саһыыта дьэ хомунан, силигэ ситэн дьэ киирдэ. Били “барахсана” батыспыт аата биир.
    - Чэ сырыттын. Баҕар туохха эмит туһалыа – Оппуонньа ытын оҕотун таптаабыт харахтарынан көрө-көрө.
    Ол курдук субуруһан сэһээккэлэрин этэҥҥэ буллулар.

    0
  • Хомустан
    16 июня 2015
     

    - Бээрэ, тыалбыт уларыйбыт дуу. Ити мончууктары арыый тыалатан бэриллииһик уонна эбии оол сөкү аннынан көҕөттөрбүн олордууһукпун – диэн Оппуонньа саҥа таһааран быһаарынна.
    Эппитин курдук мончууктарын уларытарын уларытан, эбэрин эбэн барда. Көҕөттөрүн миэстэлэрин буллартаан баран кэлбитэ сэһээккэтин иннигэр биир чөркөөкү мончууга тиэрэ таһылла сытар.
    - Бай! Бу хантан кэлэн өттүктээтэ. Барытын олордон курдук гыммытым дии – диэн баран Оппуонньа эргиллэн мончууктарын диэки олоотоото.
    Биир атыыр чөркөөкүтэ мэлиһээй!
    - Онтон олордор курдук гыммытым дии! – диэн иһэн хараҕын кырыытынан көрбүтэ Доҕоро аны көҕөнүн соһон иһэр эбит.
    - Бу баранаагы көр! – диэбитинэн Доҕоругар утары барда.
    Тиийэн мончуугун Доҕоруттан нэһииччэ төлө туттарда.
    - Аны маннык гыныма. Бу мончуук дии – кыра соҕус кэпсэтии кэннэ мончууктар миэстэлэрин буланнар сэһээккэлэригэр киирдилэр.
    Доҕоро киирээт маарыыҥҥы миэстэтигэр сытынан кэбистэ, өр буолбакка мунна тыаһаан барда. Кини да буоллар сылайбыт быһыылаах.
    Бороҥуйуута онно манна биирдиилээн саалар тыаһаан бардылар. Арай Оппуонньа тугу да көрбөккө олорор. Кэннигэр хонууга биир чыыбыс “сапсыҥныырыттан” ураты туох да тылбыйар кынаттаах ааспат. Ээ арба, биир үгүрүө баара үлтү түһээри куттуур. Оппуонньа илин диэки хайыһан олорор. Онон им хоту буолан уута син көстөр. Онон санаата бөҕөх.
    - Сарсыарданнан Байанай тугу эмит өлүүлүүр ини – дии-дии термостаах чайын иһэн сыпсырыйар.

    0
  • Хомустан
    16 июня 2015
     

    Арай көҕөн мончууктарын диэки туох эрэ “күлүкүчүс” гыммытыгар Оппуонньа сэгэс гына түстэ. Баччаҕа, бороҥуйга, көҕөн сылдьар кэмэ. Атыыр көҕөн сороҕор итинник эмискэ, тыаһа суох, баар буолааччы. Өкдөйөн көртө мончууктар тыа өттүлэригэр дулҕа эбиллэн хаалбыт. Саараама хамсаабат. Оппуонньа саатын ылан кыҥаан көрдө. Мончуугун таарыйыыһык.
    - Кэтэһиэххэ, куруук олорбот ини – бэйэтэ-бэйэтин уоскутунар.
    Табаах быстыҥа курдук буолан баран “дулҕата” талааныран кэллэ. Бастаан сэмээр миэстэтигэр, онтон “эр” ылан дьэ хамсаата.
    - Маат-маат – диэн хайа барда.
    Мончуук күлүгүттэн тахсыыта тэргэн тыаһа өрө хабылла түстэ.
    Ону кытта сэһээккэ иһигэр мучумаан бөҕө буола түстэ ээ! Соһуйбут ыт оҕото диэн, үөрбүт киһи аллайыыта диэн!
    Арыый уоскуйаннар, баран, кустарын ылан кэллилэр. Аарыма атыыр көҕөн эбит.

    0
  • Хомустан
    16 июня 2015
     

    - Бу көҕөн диэн кус. Дьэ Доҕор биһиги бу манныктары бултуу кэллибит – Оппуонньа куһун ытын иннигэр ууран олорон “курс молодого бойца” ыытар. Доҕоро хаһан да көрбөтөх көтөрүттэн куттаммыт курдук тутуннар да тойоно аттыгар баарыттан син санаата бөҕөх быһыылаах. Ытыран иҥин көрдө.
    Ол курдук сэһээккэ иһигэр, күн уота саҕаҕы сырдатыар дылы, син бодьуустастылар. Ытын үөрэтэр уонна дьарыйар үгэнигэр буолан икки чөркөөкү тэлээрэн ааспытын көрбөккө да хаалла.
    Сааскы күн саҕахха тахсан сандаарыыта лаппа дьыбарсыйда. Сорох уулар тоҥон күлэн кэбистилэр. Оппуонньалаах уулара хоойдото буолан уонна налыы буолан кытыыта барбах тыртыйда эрэ. Күөл диэки баар булчуттар муустаах ууну кэһэн күллүргэтэллэрэ иһиллэр. Эмискэ күөл диэкиттэн үөр чөркөөкү, чурус-чурус диэбитинэн,утары көстөр көлүччэ үрдүгэр биирдэ баар буола түстэ. Хаймах гынаат эрийэ тутан Оппуонньа мончууктарын көрдө-көрбүтүнэн түһүннүлэр. Кэллилэр да мончууктар уҥа өттүлэригэр түһэн барылаатылар. Уон бэйэлэрэ уон аҥыы! Оппуонньа хоһулатан кэтэспэхтээн олордо. Бастаан икки, онтон түөрт, биэс. Биэс буолбутугар Оппуонньа өрө тыынан баран элбэрээгин төлө тутан кэбистэ. Хоһуласпыт кустар күөрэ лааҥкы бардылар. Атыттара ойон туруулара иккис уоһун “тыыннарда”. Хап сабар икки кус умса “куйаабыллаатылар”. Саа тыаһа сарсыардааҥҥы дьыбарга ыраахха дылы дуораһыйда. Эмиэ сэһээккэ иһэ өрө оргуйа түстэ эбээт! Онтон Оппуонньалаах икки аҥыы ыһыллан таҕыстылар.

    0
  • Хомустан
    16 июня 2015
     

    Оппуонньа ытынаан кустарын хомуйа тэбиннилэр. Оппуонньа били биэһин хомуйан баран кэлиҥҥи кустарыгар уу кэһэн тэпсэҥнээтэ. Ол сылдьан ыттааҕын олох да умнан кэбистэ. Арай тиийтэ биирдэрэ эрэ өрөҕөтө маҥхайан сытар. Биирэ мэлигир.
    - Бээрэ, онтон иккиэн өлбүт курдуктара дии. Ама куоттаҕай. Куотар да сирэ суох курдук дии – диэт Оппуонньа төгүрүйэ көрүтэлээтэ.
    Ханна да кус көстүбэт .Ол туран хараҕа сэһээккэ кэннигэр тугу эрэ букунаһар ытыгар хатанна. Ыта ойуоккалыыр, эмиэ да ырдьыгыныыр. Ыҥырбытыгар да кыһаммат. Улахан үлэҕэ баттаппыт быһыылаах.
    - Бу баранаагыҥ баара куспун таһааран оонньуур дуу – диэбитинэн сэһээккэтигэр барда.
    Ыта биир атыыр чөркөөкүнү таһааран бодьуустаһа сылдьар эбит. Ырдьыгыныы-ырдьыгыныы харбаан көрөр. Онтон ыһыктан кэбиһэн баран туора ойор.
    Оппуонньа тиийэн ытын хайҕаан имэрийэн ылла.
    - Доҕор маладьыас! Куруук маннык таһаарар буолаар – дии-дии куһун ылан кустарыгар холбуу тутан сэһээккэтигэр киирдэ.
    Доҕоро хайҕанан кутуруга тулла сыста. Онтон хомунан үүтээннэригэр бардылар.
    Ити курдук Оппуонньа саҥа доҕордонон хаалла. Сааскы көҥүл устата иккиэн бииргэ илигирэһэн биэрдилэр. Олох дьиҥнээх доҕордуулар буоллулар.
    Доҕоро күнүһүн көҥүл көччүйэр. Чөкчөҥөөлөрү, чыыбыстары эккирэтэр, кутуйахтары сырсар. Быыһыгар, дьон таарыйдаҕына, олбуоругар тойоргуур. Куска киириигэ булгу киирсэн дурдаҕа сытар. Олох аналлаах миэстэлээх. Оннооҕор кустаһа кэлбит Оппуонньа быраатын дурдаҕа киллэрбэт. Миэстэтин кимиэхэ да туран биэрбэт. Быыһыгар кус хомуйсар. Оппуонньа илим көрөн таҕыстаҕына ирээттэһэн собо сиир. Олох тыы тахсарга кэтэһэн чохоллон олорор.

    0
  • Хомустан
    16 июня 2015
     

    Оппуонньа Доҕорунаан син бултуйдулар. Онон үөрүүлэрэ-көтүүлэрэ баһаам. Оппуонньа ордук Доҕоруттан үөрэр. Күнү быһа да кэпсэтэ сылдьаллар. Доҕоро да астынар быһыылаах. Оппуонньа тугу эмэ дьарыйдаҕына кыҥнаҥныы-кыҥнаҥныы истэр. Син ону маны өйдүүр курдук туттар.
    Көҥүл бүтэн дэриэбинэҕэ киирдилэр. Оппуонньа эбэттэн ыт оҕолоох кэлбитин дьоно соһуйуу бөҕө. Доҕоро дьэ олбуорга киирээт күүлэҕэ тахсан муннукка сытынан кэбиспитэ. Ол эмиэ кини сокуоннай миэстэтэ буолта. Хайа да киһи онтон үүрбэт буолта. Кырабын диэбэккэ олбуоругар баар хаһаайыстыбаҕа хаһаайын буола түспүтэ. Били олбуору курдат сылдьар ыттары сүгүн аһардыбат буолта. Төһө да кыра буоллар хаһаайын хаһаайынынан буола түстэ. Уопсайынан Оппуонньаттан атын дьону билиммэт да этэ. Дьиэлээхтэри да Оппуонньа дьоно эрэ буолан тулуйар курдуга. Бэл атыттар аһаттахтарына да аһаабата. Оппуонньа хас хараҕа хамсыырын кэтэһэ көрөрө. Бэл сөтөлүннэҕинэ да толоро сүүрүөх курдуга.
    Сайын от саҕаланан эмиэ алаастарыгар көстүлэр. От бөҕөнү оттоотулар. Доҕоро ону-маны барытын туһалыыр буолла.Улаатта даҕаны. Бэл чороох аҕалан биэрэр. Оппуонньа этэрин барытын толоро охсор. Дьоно дьаһалымсыйдахтарына кумаардаан да көрбөт. Киэр хайыһан баран дьүгэлийэн биэрэр.
    Күһүн буолан эмиэ кустуур буоллулар. Доҕор кус таһаарар, булар эбээһинэстээх. Куһу булан аҕалан Оппуонньа атаҕын анныгар ууран кэбиһэр.Сороҕор атын дьон ытан баран булбатах кустарын иҥин булан аҕалар. Быыһыгар сытыйан эрэри иҥин аҕалан мөҥүллэр.
    Күһүөрү биир сарсыарда Оппуонньа таһырдьа тахсыбыта күүлэтигэр куобах илин өттө сытар.
    - Бай бу тугуй? Куобах дуу. Онтон Доҕоор кэннэ – диэбитинэн Доҕорун диэки көрүтэлээтэ.

    0
  • Хомустан
    16 июня 2015
     

    Ынарааҥҥыта буруйдаммыт киһилии хараҕын кистии туттан баран кэннин диэки хайыһан олордо. Оппуонньа Доҕорун имэрийэ-имэрийэ:
    - Доҕор дьэ үөртүҥ! Маладьыас! Ол эрэн аны бүтүн аҕалаар. Маны хайдах дьиэбитигэр илдьиэхпитий? – дии олордо.
    Ыта хайҕаммытын билэн эмиэ эйэҥэлээн барда. Ити “маладьыас” диэн тыл улахан хайҕабылын билэр буоллаҕа эбээт.
    Онтон ыла хам-түм куобах аҕалар идэлэннэ. Уонна куруук бүтүн.
    Биирдэ күнүс күрүө тута сырыттылар. Эмискэ Оппуонньа сиэбигэр телефон тырылыы түстэ.
    - Алло истэбин
    - Дорообо! – дьахтар саҥата.
    - Дорообо!
    - Машабын.
    - Ханнык? – Оппуонньа соһуйа иһиттэ.
    Манна диэн эттэххэ билэр да Машата суох эбит.
    - Чайнойтан.
    - Ээ – диэн түөһүннэ.
    - Ханна бааргыный? – дьахтар саҥата күлүмнэтэн олорор.
    - Алааска – Оппуонньа олох мунна.
    - Манна эйигин биир киһи көрдүүр.
    - Бай! Ол киммитий?
    - Ээ эйигин буолбатах.
    - Хайдах?
    - Ытыҥ оҕотун. Били саас ыт оҕотун ылтыҥ дии. Ол сүтүктээх киһи кэлэн ытын оҕотун ыйыталаһар.
    Оппуонньа олоро түстэ.
    - Тоҕо? – билигин да өйдөөбөттүү көрөн олордо.
    - Онтон ылаары гынар быһыылаах, улахан булчут ыт оҕото үһү.
    - Ону?
    - Чэ, бэйэтин кытта кэпсэт – дьахтар саҥата умайыктанар.
    Оппуонньа сырайын ити кэмҥэ көрүөҥ этэ!
    - Дорообо! Ытым оҕотун ылыам этэ – эр киһи саҥата иһилиннэ.
    - Онтон баччаҕа дылы ханна сылдьыбыккыный?
    - Кэлэн ылар кыаҕа суох сырыттым.
    - Ыт миэнэ ээ.

    0
  • Хомустан
    16 июня 2015
     

    - Эс доҕор! Манна туоһулар да элбэхтэр, аны дөкүмүөнэ да миэхэ баар!
    - Ээ – дии-дии Оппуонньа мээмиргии олордо.
    Кини Доҕорун дьоҥҥо биэриэн төбөтүгэр буһарар да кыаҕа суоҕа.
    - Сотору тиийиэхпит, манна ыйан биэрдилэр – телефон арахсан хаалла.
    Онтон туох буолтун Оппуонньа улаханык да өйдөөбөт. Арай ытын хомойбут хараҕа массыына кэлин түннүгэр көрөн олорорун эрэ өйдүүр.
    - Бэйэм, бу илиибинэн тутан баайдаҕым үһү! – дии-дии айманар.
    Онтон хас да күн ытын суохтаан эрэйи көрдө.
    Арай биирдэ ыала уол:
    - Доор, онтон мин массыынабынан баран уоран аҕалбаппыт дуо? – диэн соһутта.
    - Ээ, кырдьык барыахха! – Оппуонньа ойон турда.
    Сырайдыын-харахтыын сырдаан кэллэ.
    - Оннук! Оннук! Барыахха! – диэт ойон туран иһэн олоро түстэ.
    - Алдьархай! Ноо ол дьон хантан да сылдьалларын билбэт эбиппин дии! Ыйыппатахпын! – эмиэ мэрбэҥнээн барда.
    Куомуннаахтар кэтэххэ бэрдэрбит дьон курдук буоллулар. Били аҕыйах мүнүүтэтээҕи өрүкүнэһии суох буолла. Уку-*** табаахтыы олордулар.
    - Ээ, мин биллим! – ыала уол ойон турда.
    - Тугу доҕор?
    - Чайной Маашатыгар барыахха, билэр буолуохтаах!
    - Оннук! Бара охсуохха!
    Хаахынаабыт уазигынан өр гыммакка чайнойга тэптэрэн тиийдилэр.
    Маашалара прилавок нөҥүө кумаахыга тугу эрэ суруксуттуу турар. Киирбиттэригэр өйдөөбөтөхтүү мэлээриччи көрөн кэбистэ.
    - Ыт ылбыт даа? Ону мин хантан билэбин! Хармааммар уктан турарбар дылы миигиттэн ыйыталаһаҕыт дуо? – Мааһалара өрө хабатайданан барда.

    0
  • Хомустан
    16 июня 2015
     

    - Онтон, үнүр эн ыйан ыыппытыҥ дии?
    - Онон-манан кииримэҥ-тахсымаҥ! Хас барар-кэлэр дьону аны миигиннэн манатаргыт хаалбыт дии! Эккэйэбээттэр!
    Оппуонньалаах хата “бүтүн” дьүгэлийдилэр.
    Онтон ыла “уорар” санаа тохтоото. Ити курдук ый кэриҥэ кэм ааста. Оппуонньа сарсыарда аайы ойон тураат тахсан күүлэтин көрөр. Суоҕун курдук суох. Санаатыгар куруук кэлиэ диэн саныыр.
    Биир сарсыарда күүлэҕэ тахсан иһэн соһуйан олоро кэлэн түһэ сыыста.
    Иннигэр куобах аҥаара урукку сиригэр сытара. Оппуонньа ытын уйатын диэки эргичис гынна. Доҕоро кинини тонолуччу одуулаан уйатын иннигэр сытар эбит.
    - Доҕор, Доҕоор! – диэн Оппуонньа нэһииччэ ыган таһаарда.
    Ыта ону кытта ойон туран Оппуонньаҕа түөһүгэр биирдэ баар буолан хаалла. Уонна Оппуонньа сырайын салаан салыбыратан барда.
    - Доҕоор бырастыы! Аны арбаҕастаахха да биэрбэппин! Ырбыккын ахан дии Доҕоор! Суох! Суох! Аны баҕас биэрбэппин Доҕоор!

    0
  • командировачник
    16 июня 2015
     

    Бэт кэпсээн, биир тыынынан аахтым. Онтон сал5ыытын куутэбит.

    0
  • командировачник
    16 июня 2015
     

    Хомустан бэйэн айымнын дуу , хантан уларыстын дуу. ?

    0
  • Хомустан
    17 июня 2015
     

    Улассааччым суох.

    0
  • командировачник
    17 июня 2015
     

    Дья оччо5уна сал5ыытын кэтэьэ хааллым, сынньаланна аа5арга олус учугэй киьи морально сынньанар.

    0
  • хата
    17 июня 2015
     

    алгаска енейееччу буолан бэрт кэпсээни аахтым)

    0
  • 77
    20 июня 2015
     

    бэт,бэт.

    0
  • Хомустан
    20 июня 2015
     

    Махтал буолуохтун!

    0
  • командировачный
    21 июня 2015
     

    Хомустан куех тунах ыьыа5ынан итии истин э5эрдэтэ тут, кэпсээннэргин хоьоонноргун барытын кэриэтэ аахтым быьылаах форумна тахсыбыттарын. Но сэьэнин кэпсээнин элбэх буолуо манан эрэ мунурдаммакка, хантан булан ылан аа5абын субэлээ эрэ или айымнын ханна атыыга баар дуо ?

    0
  • Ион
    22 июня 2015
     

    бэрт да кэпсээн

    0
  • Хомустан
    22 июня 2015
     

    Махтал! Кэпсээннэрим барыта форумҥа бааллар. Бэчээттэммит суох.

    0
  • Хомустан
    21 ноября 2019
     

    Киирбиччэ өрө көтөҕөн биэриэххэ,

    0
  • Мин
    25 ноября 2019
     

    Оннук

    0
  • Ждемс
    28 апреля 2020
     

    Дальше суруйан ис.

    0
Обратная связь