Күндү форум олохтоохторо!
Бу форум Дьоһун саас форуму кытта холбонно, саҥа холбоһуктаах форум Сахалыы диэн ааттаах.
Бу сирэйгэ саҥа теманы эбэтэр комментарийы суруйуу кыаллыбат, ол гынан баран холбоһуу иннигэр суруллубуту ааҕар кыах хаалар.
Саҥа Сахалыы холбоһуктаах форумҥа киириҥ, кэпсэтиҥ!
Харантыыҥа олорон оҕолор ааҕалларыгар хоһооннорунан флешмоб
А.Хампа  -    2795
Тураах, тураах атаһым,
Турулуччу көрөҕүн.
Кыталыктыы туттаҕын,
Кынталдьыйа хаамаҕын.

Тойон кыллыы көтөҕүн,
Тииккэ кэлэн түһэҕин,
Булан талан аһыыгын,
Бухатыырдыы туттаҕын.

Ханна баран көрдүүбүн,
Хата ыйан биэрдэргин,
Хантан аһы булабын,
Хаһыытааҥҥын этэҕиэн?


Кынаттаахпын, көппөппүн,
Күөлгэ, ууга киирбэппин,
Куттанабын олуһун,
Кустуу устан барбаппын.

Күммүт ойон тахсыыта,
Хаһыытыыбын туруора,
Саппыкыбын кэтэбин,
Сэриилэһэ киирэбин.

Түөспүн күүскэ мөтөтөн,
Тойон курдук хаамабын,
Тиэргэн устун күүлэйдээн,
Туорахтары көрдүүбүн.

Кыыһар кыһыл тарааҕым,
Күлүмүрдэс бытыгым.
Кутуругум хоройор,
Күүскэ тыалга тэлимниир.


Күһүнүм кэлиитэ,
Көтөрбүт барыыта,
Арҕахпар киирэбин,
Утуйа сытабын.

Кыһыны билбэппин,
Түүллэри түһүүбүн,
Тымныыны билбэппин,
Таһырдьа быкпаппын.

Саас сылаас буолуута,
Салгыҥҥа тахсабын.
Сыһыыга сылдьабын,
Сэрэнэн хаамабын..


Собо

Күнүм уота сыдьаайар,
Күлэн үөрэн дьиримниир.
Көҕөн куспут түһээхтиир,
Күлүктэрин көрөөхтүүр.

Көмүс куйах кэтэммин,
Күөлбэр уста оонньуубун.
Өлөҥ булан аһыыбын,
Оонньоон уубун чалбыыбын.

Балыксытым баалама,
Хопто көтөр айманар,
Кынатынан сэрэтэ,
Кылбачыйа дайаахтыыр.

Илимнэргин хаппаппын,
Ардьаах туугар киирбэппин,
Дириҥ ууну буламмын,
Саһа бүгэ сытабын.


Бах, бах, баҕа буоламмын,
Бадарааҥҥа дьиэлээхпин.
Баҕабынан сылдьабын,
Балыктардыын иллээхпин.

Күөҕү ордук таптыыбын,
Хаалтыс түөспэр иилэммин,
Күөхтүүр көстүүм кэтэммин,
Күүлэйдиибин ыстанан.

Кыырай халлаан устунан,
Алыс өйдөөх буоламмын.
Көҕөн атас кустардыын,
Айанныыбын күөллэргэ.


Сордоҥ

Сундулуйа устаммын,
Сордоҥ аатын сүгэбин.
Суоһурҕана туттаммын,
Сүрдээх моҕус балыкпын.

Тугу барытын сирбэппин,
Тииһим сытыы адьаһын,
Тойонноро аатыран,
Топпот мэлдьи куртаҕым.

Өксөйөбүн сүүрүгү,
Өрүү мэлдьи көрдүүбүн,
Өрүстэргэ мэниктээн,
Өрө көрө оонньуубун.


Собо

Күөллэрим уутугар,
Күөнэхтиин кыттыһан,
Мундулуун мунньустан,
Мэниктии оонньуубун.

Күлүмнэс куйахпын,
Кэтэммин, таҥнаммын,
Көрүлээн ылабын,
Көччүйэ устабын.

Долгуммут дьиримнээт,
Дуоһуйа эккэлиир,
Кылбайан хоптобут,
Күлүгүн көрүнэр.

Тыыгынан кииримэ,
Көҥүлбүн быһыма,
Илимҥин үтүмэ,
Муунхалаан ылыма.


Оонньуурдарбын сааһылаан,
Оннуларын булларан,
Бэрээдэктээх аатыран,
Бастыҥ оҕо буолабын.

Куукулабын көтөҕөн,
Оронугар илдьэбин.
Биһик ырыа таһааран,
Аргыый ырыа ыллыыбын.

Ийэм курдук хамсанан,
Иистэниэҕим иннэнэн,
Былааччыйа тигиэҕим,
Барыгытын үөрдүөҕүм.


Тигээйилэр

Уйабытын тыытымаҥ,
Олохпутун аймаамаҥ.
Бары көтөн тахсыахпыт,
Бары саба түһүөхпүт.

Иннэлэрбит тигэллэр,
Үҥүү курдук сытыылар.
Олус күүстээх буойуммут,
Охсуһары сатыыбыт.

Эккирэтэн тутуохпут,
Элбэх буолан кыайыахпыт.
Суоһурҕана дайыахпыт,
Сапсынаммыт ситиэхпит.


Кымырдыҕастар

Үгүс элбэх буоламмыт,
Үмүөрүһэ сырсабыт,
Үлэлиири таптыыбыт,
Уйабытын туттабыт.

Олус иллээх буоламмыт,
Олоробут, мустабыт.
Сылаас сиргэ кистээммит,
Сымыыппытын таһабыт.

Атахтарбыт түргэттэр,
Алыс олус күүстээхтэр.
Оҕус курдук муостаахпыт,
Отой бары бииргэбит.
Ответов 0
Обратная связь