Кыайыы Күнэ
Бүлүү КЫЫҺА  -    168
Бүлүү КЫЫҺА



Харах уулаах Улуу Кыайыы Күнүнэн!


( Сэрии толоонугар охтубуттар сырдык кэриэстэригэр, тыыл бэтэрээннэригэр, сэрии сылын оҕолоругар, тулаайахтарыгар анаабыт хоһооммун баҕар кимнээх эмит үллэстэн, монтаж гынан Кыайыы күнүгэр кулууптарга, уулуссаларга ааҕыахтара, оҕо-ыччат устуоруйабытын интэриэһиргээтин уонна хаһан да сэрии буолбатын диэн санааттан ыытабын).


Харах уулаах Улуу Кыайыы Күнэ!
Хара суругу сундууктан ылан,
Хаттаан аахпыт, түөскэ
Хам тутан ытаабыт,
Хаҕыламмыт сүрэх бааһыттан
Халыан
Хаһыы төлө барбыт күнэ.
Хайдыбыт мастыы көнө,
Хаһан да албыннаабатах,
Ханна да саспатах,
Халыҥ
Хаххабыт, суон дурдабыт
Хаарыаннаах эр дьоммут
Хаттыга суох
Халтаҥ таҥаһынан
Хахсаат тыалга үрдэрэ,
Хаар – самыыр аннынан,
Хаххата суох сирдэринэн,
Хоруо-буруо ортотунан
Харса суох атаакаҕа кимэн,
Хардыылыыллара иннилэрин эрэ диэкки.
Хам-түм, биирдэ эмэ буолар
Хараан түүннэригэр
Харсар
Хаастаах,
Хара моонньоҕон
Харахтаах,
Хайытыллыбыт
Хойуу суһуохтаах,
Хараан дьиэлэрин
Хараҥаччытын,
Хоойго сытар
Холоонноохторун - тапталлаахтарын ахтан
Хаппахчы имэҥ түүнэ тиллэн,
Хайҕахтаах
Хара быардара
Хамныы мөхсөн,
Хааннара оонньоон,
Хабарҕалара бүөлэнэ,
Харааста
Хаайаллара, баттыыллара
Хараҥаҕа баҕаларын...
Хороҕор муостаахтарын
Хотоҥҥо бэрийэр дьоннорун,
Хоройо улаатан эрэр оҕолорун,
Хотуурдара ыллаабыт
Ходуһаларын,
Хоргуннаах алаастарын,
Хамыйахтаах сандалыларын,
Хаһыҥнаах сарсыардаларын,
Хапсаҕайдаах Ыһыахтарын,
Хадьымал устун сүүрэллэрин,
Хаадьылаһа оонньообут,
Хаампыт-сиэлбит
Хампа күөх
Харыйа быыстаах
Хаптаҕастаах, отонноох тыаларын,
Хаардаах тымныы кыһыннарын,
Харалдьыкка нуоҕаспыт ньургуһуннарын
Хатан ахтылҕанын суоһа
Хайыта салыыра дууһаларын.
Хотолдьуйар
Хочолору,
Хоруобуйалаах куораттары,
Хатыҥнардаах алардары,
Хаарыс солко мааны сирдэри
Халаатаабыт
Хаанымсах, сидьиҥ
Харамай фашистка-
Халабырдьыкка тэбистэрбэккэ,
Хамнаппакка
Хатыйа тардан
Хаайан ылан
Хайаан да үлтүрүтэр,
Хотууну-кыайыыны суһаллык аҕалар
Халбаҥнаабат биир санаалаах
Хардарсар күүстээх санаалара оргуйан,
Хадаар,
Хадьар майгыны угуйан,
Хараабат уохтара сэтэрээн,
Хабырына – кимиринэ түһээт,
Хаҥыл соноҕостуу
Хаһыҥырайаат эрдээхтик,
Хабырыйса-үтүрүйсэ
Хорсуннук уоту утары ойбуттара-
Харыстаабатахтара бэйэлэрин.
Хадьыктаһа охсуһа сылдьан,
Холорук эрийэр үөһүгэр сөрөнөн,
Хомуһуннаахтар алҕаабыт
Харысхал бэлиэлэрин силэйэн,
Хабыр,
Хабараан
Харсыһыы мэҥиэлэрэ буоланнар,
Хайыылаах балыктыы
Хатыллыбыттара өстөөх илимигэр,
Хапкааныгар киирбиттэрэ,
Хаптарбыттара буулдьатыгар...
Хомолто,
Хоргутуу санааҕа сууланан,
Хоту дойду
Хоһуун уоланнара
Хараллыбыттара,
Хаалбыттара атын сир буоругар...
Хатат уотунан мичээрэн
Хап - хара баттахтаахтар
Хаартыска эрэ буоланнар
Хараарчы көрбүттэрэ
Хаймыылаах таас арааматтан...
Хантайан туран үөһэ быраҕа-быраҕа
Хабан ылан сыллыыр,
Хара тыа булдун сүгэр
Хачыгыраччы
Хаамар,
Хаамыскалаһар,
Хабылыктаһар,
Хампыат сиэтэр,
Харах симсэр аҕалара
Ханна баран, тоҕо сүттэ диэн
Хачаайы оҕолор аҕаларын суохтаан
Харыһыттараллара эрэ
Халыйа сүүрэр
Харахтарын уута буолан
Хаастарын түрдэһиннэрэн,
Хаппырыыстана ытаан муҥнаналлара,
Хараарбыта күннэрэ-
Хачыаллана оонньуохтаах оҕо саастара
Хампарыйбыта
Хаттаан төннүбэттик...
Харалта, дьаһалта төһө да
Харааннаатар,
Харыстаатар
Хантан тэҥнэһиэй аҕа тапталыгар-
Хаардааҕынан-уулааҕынан көрөннөр
Хаһан да ааспат-арахпат дириҥ ахтылҕаны
Харыннарыгар иҥэрэн, арыт
Хоҥурууга
Хоммокко,
Хабахха тыынары да билэн,
Халыр босхо үөрбэккэ-көппөккө,
Харгыстана улааппыттара.
Хаалынньаҥ тулаайах барахсаттар
Хара сурукка итэҕэйбэккэ,
Хабаана суох дириҥ аһыыттан,
Хантан кэлэрэ биллибэт
Халаан уутунуу дэлэй
Хабархай аһыы
Харах уутугар чачайа,
Халтаһалара иһэ
Хаһан төннөллөрүн эрдээхтик күүппүттэрэ,
Харабыллыы манаабыттара айан суолун.
Хааттарыахтара түүн-күнүс кэлэн диэн,
Хаһан да
Хатаммат буолбуттара
Халҕан ааннар.
Хочуоҥкаҕа ыйаммыт саалар,
Хайыһардар,
Хомуллубут
Хосторго
Хонон турар ороннор,
Холумтаҥҥа, долборукка иһиттэр
Хаһан да тыытыллыбакка, иһийэн
Хаһаайыттарын эрэнэ күүппүттэрэ.
Хаһан да таптамматах кыргыттар,
Холлорун этэ
Хойдо илик
Холоонноох эдэр доҕотторо симэлийэн,
Холбоһон ыал буолан,
Хоннох анныгар
Хорҕойор
Холоонноох кэргэн буолары билбэккэ,
Хат буолан,
Халадаай ырбаахы кэтэн,
Ханаҥнаан оҕо төрөппөккө
Хатаччы
Хаппыттара,
Хагдарыйбыттара сиппэккэ...
Хатырбыт баабыр илиилэри кэтэспитэ
Холкуос бүппэт сындылҕаннаах үлэтэ...
Хотун Эбэлэр долгуйан,
Хоодуот уолаттарын аһыйан,
Хараара баалланан устубуттара...
Хаһааныллыбыта кичэллээхтик
Хопполор,
Хааһахтар
Хайдалларынан
Хадаҕалыыр ас арааһа:
Хоҥор
Хаас, кус саамай эмиһэ,
Харта,
Хайах,
Хаһа,
Хатыыс балык кытта.
Хас арҕааттан кэлбит
Хараҕын-сирэйин манаһыы,
“Хаарыаныы, төннүбүүт!” диэн ымсыырыы,
Ханна-тугу билбитин туоһулаһыы,
Хардатын
Хап сабар
Хайаан да
Ханнарыылаах
Хоруйдааһын
Худуоһунньук
Харандааһынан ойуулаабытын тэҥэ
Ханыылыы
Хартыыналар
Хас да кыстык
Хаар
Халдьыгырыы ууллан аастар да, син биир
Хатылана турбуттара,
Хал буолан сүппэтэхтэрэ...
Халдьаайыга тахсаллара да чугаһаабыттар
Холуодалаах ааннара
Хас аһылыннаҕын ахсын өндөйөөхтүү сыппыттара...
Хомойуох иһин, барыта
Халтайга, кураанахха этэ...
Хааллаҕа ол эрэллээх өр кэтэһии-
Хардарыта көрсүстэхтэрэ анараа...
Хапсыйбыт,
Хаҕыс олохтоох, тар
Хааһынан үссэммит,
Хохту
Харахтанан
Хойуорбутунан көрөн
Хайа охсубут аҥаардара да хааллар
Хомуут кэтэн кырдьаҕастар, кыргыттар-
Хамаҕай үлэһит үтүөлэрэ
Хоһууннук тыылга үлэлээбиттэрэ.
Хобдох олохтоох,
Хам – аччык, оонньуурун, оҕо буоларын умнубут
Хаппыт – куурбут оҕо саас
Хап-хатыҥыр
Харытын ньыппарынан,
Хара күүһүн мунньунан, көлөһүн алла
Хачыгырайа үлэлээбитэ
Хааппылаҕа
Хааппыла эбиллэн,
Халыҥ,
Халҕаһа көмө буолбуттара
Хайҕаллаах күммүт кэлэригэр.
Хонук – сыл аастаҕын аайытын
Халыаннык аһыйбыттар көҕүрээннэр эбитэ дуу
Харыс ырааттар ыраатар курдук
Халаҕыйбыт баастаах-үүттээх
Халымыра суох өйдөбүлбүт.
Халыҥаабатын
Хаһан да тириибит-
Холус тыллаах
Холуннарааччы-
Хой баһын туойааччы симэлийэ сүттүн!!!
Хаһан да өлбөөдүйүмэ Эн,
Харах уулаах Улуу Кыайыы Күнэ!!!
Хас сыл ахсын бу күн
Халлааммыт ордук ырааһырар
Хаарыан олохторун толук уурбуттар
Хааннарынан сууйаннар...
Хоолдьуктаах бэйэбит
Хоҥкутуоҕуҥ төбөбүтүн бүгүн
Хонууга охтубуттарбыт кэриэстэригэр!
Хаһан да сэрии буолбатын туһугар
Хотууну-кыайыыны аҕалбыттарбыт
Хаартыскаларын өрө тутан
Ханан эрэ аттыбытыгар баалларыныы санаан
Ханыылаһа саҥата суох иһийэн
Хаамыаҕыҥ сэлэлээн бүгүн
Хотоҕостуу субуллан
Холуоннанан барааттаан,
Хомуспут тыаһыгар уйдаран,
Холууппут эйэни уруйдуу кыырайа көт үөһэ...
Хорсун-хоодуот эр дьоммут-
Хомпоруун
Хотойдорбут, кынаттарын кумутан
Хара буорга сууллубуттарбыт
Хайаан да Бу Күн үөһэттэн одуулуу
Хайыһаллар эбээт биһиэхэ, араҥаччылыы...




05.05.2013с.
Ответов 0 Написать ответ
Ответ на тему: Кыайыы Күнэ
Введите код с картинки*:  Кликните на картинку, чтобы обновить код
grinning face grinning face with smiling eyes face with tears of joy smiling face with open mouth smiling face with open mouth and smiling eyes smiling face with open mouth and cold sweat smiling face with open mouth and tightly-closed eyes smiling face with halo smiling face with horns winking face smiling face with smiling eyes face savouring delicious food relieved face smiling face with heart-shaped eyes smiling face with sunglasses smirking face neutral face expressionless face unamused face face with cold sweat pensive face confused face confounded face kissing face face throwing a kiss kissing face with smiling eyes kissing face with closed eyes face with stuck-out tongue face with stuck-out tongue and winking eye face with stuck-out tongue and tightly-closed eyes disappointed face angry face pouting face crying face persevering face face with look of triumph disappointed but relieved face frowning face with open mouth anguished face fearful face weary face sleepy face tired face grimacing face loudly crying face face with open mouth face with open mouth and cold sweat face screaming in fear astonished face flushed face sleeping face dizzy face face without mouth face with medical mask face with no good gesture face with ok gesture person bowing deeply person with folded hands raised fist raised hand victory hand white up pointing index fisted hand sign waving hand sign ok hand sign thumbs up sign thumbs down sign clapping hands sign open hands sign flexed biceps
  
Предложения и замечания