Үбүлүөйгүнэн, Михаил Ефимович!
Суруйдаана  -    471
Суруйдаана


Үбүлүөйгүнэн, Михаил Ефимович!


Баай
Байанайдаах сэтинньигэ
Боростуой ыалга,
Билиҥҥигэ холоотоххо,
Бэрт дьадаҥы дьоҥҥо
Боһуоннуун кытта
Бэрт мааны
Буолан айыллан,
Бэбээрэ ытаан,
Бөкүнүс-төкүнүс гыммытыҥ
Бүгүн томточчу туолан,
Буолбут эбит 80 сааһыҥ.
Биэрибэйтэн онуска дылы
Биир да үһэ суох
Биэньиэр, хомсомуол буола
Бэрт үчүгэйдик үөрэнэн,
Буутуҥ этэ буһан, холуҥ этэ хойдон,
Борбуйгун көтөхпүтүҥ.
Бырастыы гыныҥ миигин,
Баһаалыста, этэрбин-
Бары хайдах эрэ намтата ааттыыр
Бэтэринээрдэрин үөрэҕэр үөрэнэн,
Бастыҥ устудьуон буолан,
Бүтэрбитиҥ Омскайы, кэлин
Бас-көс салалта үөрэхтэрин
Бэри-бэркэ
Бүтэртээҥҥин,
Билиигэр билии эбиммитиҥ.
Биллэн турар,
Бастаан идэҕинэн
Бэрт кылгас кэмҥэ
Бугуһуйа үлэлээҥҥин,
Баарыҥ батарбатаҕа-
Бүргэһи куулга кистээбэккин,
Баһылыыр-көһүлүүр өрүккүн,
Ботуччу
Бэриһиннэриилээххин
Бэлиэтии көрөннөр    
Билгэлээннэр, сэҥээрэннэр
Бултаах-алтаах,
Балыктаах Эдьигээн хомсомуолугар,
Баартыйатын салайааччынан
Бүк эрэнэн туран,
Бастайаанна анааннар,
Бас-көс үлэҕэ
Бастакыгын сүрэхтэнэн,
Бар дьонуҥ көрүүтүгэр
Быктарбытыҥ дьоҕургун.
Бука, итинтэн саҕаланнаҕа
Биир да күнү көтүппэккэ,
Баскыһыанньа да диэн өрөөбөккө,
Бокуойдана-сололоно түспэккэ,
Бэйэҥ тускун умнан туран
Булгуруйбат
Биир санаалаах-
Биһиккин ыйаабыт Сахаҥ сирин туһугар,
Бүттүүн сахаҥ норуота
Байылыаттык олорорун туһугар,
Билиигин-көрүүгүн, сатабылгын
«Бааргын барытын ууран»,
Будьурхай хойуу хара
Баттаҕыҥ
Бүүс-бүтүннүүтэ
Баата маҥан буолуор диэри,
Бүгүҥҥү күҥҥэ дылы
Былааннаан, толкуйдаан,
Бырайыактаан, туруорсан
Болдьоҕо суох үлэлиир
Боотур
Бэрдэ буолан,
Бар дьоҥҥунаан сүбэлэһэ
Бэриниилээхтик үлэлээһиниҥ.
Бииртэн биир
Былаас
Былааҕын аннынан
Быраабатын кирилиэһин дабайан,
Бөдөҥ салайааччы буола үүнэн,
Буолунайдык Үрдүкү Сэбиэккэ дьокутааттаан
Биһиги дьылҕабыт иннигэр
Быһаччы эппиэтинэһи сүгэн
Бастакы, аан маҥнайгы
Бирисидьиэммит буолан
Бөрөстүөлгэр олороргор
Бүттүүммүт улаханнык эрэнэн
Быыбардааммыт үөрэ-көтө иккитэ талбыппыт.
Бүтүннүү сахаҥ таҥаһын кэтэн,
Баппаҕайгын сокуоҥҥа
Баттыы ууран,
Бииргинэн сүрэххин туттан,
Бирисээгэ ылынан
Биэрбит андаҕаргын
Барытын чиэстээхтик толороҥҥун
Быр-бааччы этэҥҥэ олоробут күн бүгүн.
Былыргы түүр омук тобохторун
Бырааппытын көмүскээҥҥин
Биллэ-көстө сайыннаран
Былдьаппатыбыт тылбытын-өспүтүн,
Битийдибит сахабыт үҥкүүтүн,
Бытарыйбатыбыт ыһыллан,
Баттаппакка-үктэппэккэ,
Батаах-үтүөх сылдьыбакка
Быһаарсабыт,
Биилээх эрбии тэҥэ эрийсэн,
Бодоруһан,
Билсиһэн,
Батыһан, доҕордоһон
Бииргэ үлэлиибит тас дойдуларынан,
Барааттаатыбыт, оһуохайдаатыбыт араас омуктуун,
Бигэтик “мин сахабын” диэтибит.
Быралыйа сүппэппит туһугар,
Барҕара сайдарбыт иннигэр,
Быһыы-майгы тыҥаабатын туһугар,
Быста-быста салҕанар тыа сиригэр
Быйаҥ-уйгу аллан
Баайдык-тоттук олорорбутугар,
Балыыһалар, оскуолалар,
Бааралаһан тутуллалларыгар,
Бадарааннаах суолбут көнөрүгэр,
Бөһүөлэктэр тупсалларыгар,
Болуоссаттар киэркэйэллэригэр,
Баайбыт сиртэн хостонон
Батарыллыбыт
Барыыһыттан
Быһаҕалаһан
Бырыһыана үлэлииригэр,
Бэрээдэккэ, сайдыыга,үөрэххэ
Баспытын
Бэйэбит
Билинэрбитигэр
Боччумнаахтык сыһыаннаһан
Болҕомтоҕун туһаайаҕын.
Бүттүүн Азия
Бэртэн
Бэрт
Быһый, сытыы
Бүдүрүйбэт
Бөҕөс оҕолоро
Бары
Бииргэ мустан доҕордоһон,
Бэһиэлэйдиир, куоталаһан
Биэтэги
Былдьаһар
Бүөрэмньи сирдэринэн буолбуппут
Барыта эн толкуйуҥ, сатабылыҥ
Буоларын
Билинэбит
Бука бары.
Бастаан, дьоллонон,
Бириис,
Бэлэх кууһан,
Бэдийистээлгэ ыттан
Бөкүнүк-төкүнүк мэтээл кэтэн,
Былааҕа үөһэ тахсарын
Бычалыйбыт харах уулаах көрөн
Быллыгырыы сүрэҕэ тэппитэ,
Бука, иҥиэҕэ кини өйүгэр үйэ саас.
Бэдиктэрбит-кэлэр кэскиллэрбит
Булгуччу мэлдьи доҕордуу буоланнар
Бэрээдэктээх, үрдүк таһымнаах
Бэрт да дьон буола үүнүөхтэрэ
Бүттүүн Аан дойду үрдүнэн Ил- Эйэ туругурарыгар
Боччумнаах кылааттарын угуохтара.
Буолунай толкуйгуттан
Биирин-кэнникитин эттэххэ:
Байаан, хомус
Балалаайка, искириипкэ
Бары муусука таһаарар тэриллэр
Билиҥҥи киһиэхэ-оҕоҕо
Былыргы киһи
Былаайахтаах дүҥүрүн тэҥэ
Бэйэтин туллар тутааҕа,
Бухатыыр куйаҕын тэҥэ буолуоҕа.
Быары-сүрэҕи хамнатар дириҥ иэйии
Бааллыбытын-хааллыбытын сүөрэн,
Бары ис кыаҕа арыллан,
Биэс салаалаах сулустуу
Бачыгырыы күлүмнүү,
Былыттаах халлааммыт
Быыһынан көстөр
Буолунай өҥнөөх кустугунан оонньуу,
Билиитэ-көрүүтэ, өйө-санаата таһымнаан,
Буруустаммыт дьоннуу сып-сытыы,
Быһыы-майгы маанылаахтара буолан,
Биһирэбилгэ, хайгалга
Бигэммит
Бэртээхэй үлэһит да дьон
Буола үүнэн-үрдээн тахсыахтара.
Биллэн турар ханна
Баҕар
Буоларыныы
Булкуурдаах кэмнэргэ
Баара араас эн суолгар:
Бэрт да
Былдьаһааччы,
Баттыы сатааччы,
Баайсааччы, хатыйааччы,
Бас баттах
Барааччы, хобулааччы,
Бобооччу-хаайааччы,түһэн
Биэрээччи,
Боруоктаһыан,
Буортулуон
Баҕарааччы, туоратааччы,
Билсиһэ-көрсүһэ сатааччы,
Бэлэмҥэ
Бэһирбиттэр,
Босхоҕо
Баҕатыйбыттар,
Батары-өтөрү саҥарбыт
Балыыҥка,
Бөппүрүөк дьон.
Барытын ааспытыҥ,
Барытын тулуйбутуҥ,
Буспутуҥ-хаппытыҥ
Буһурук куйаастарыгар,
Будулҕан тымныыларыгар
Бөҕүөрбэккэ
Бэйэҕин сүтэрбэккэ
Бэргэн эрчимэнэ
Буолбутуҥ.
Бука, саныыр санаам эттэҕинэ-
Биһиги сылаас тапталбыт,
Былыргы өбүгэлэриҥ өйөбүллэрэ,
Бөҕө –таҕа
Бигэ оҥоһууҥ, айылҕаттан анатыыҥ,
Баардыҥ,
Булугас сытыы өйүҥ
Быыһаатаҕа
Биһи дьолбутугар.
Билигин да
Быгыалыыр
Бас-баттах тыллаһааччы-
Баһааҕырдааччы
Быралыйа сүттүн Эн суолгуттан...
Баһаам да элбэх үлэни
Быһаараҥҥын, суоттааҥҥын
Бары сыраҕын-сылбаҕын ууран
Буоһалаан салайан,
Бэриниилээхтик үлэлээҥҥин
Боруостаатыҥ айылҕаттан аналгын.
Биэтэкпит
Биллэрдэ
Биири-кыайыыны!
Биһириибит улаханнык киэн тутта,
Баһыыба, махтал-таптал модунун тиэрдэбит!
Бастакы
Бэрэсидьиэммит,
Бас-көс киһибит,
Буулаҕа омук удьуора
Байааттары,
Бэттэри
Билбэккэ
Биир кэм инниҥ эрэ диэкки дьулуруйан,
Бүгүҥҥүҥ курдук үлэлии-хамныы
Бүтүн үйэ этэҥҥэ
Бэртээхийэ дьиэ кэргэҥҥэр олороргор,
Барыта үчүгэй эрэ буолуоҕар
Барҕа
Баҕабыт өрүү туола туруохтун!
ДОМ! ДОМ!ДОМ !





13.11.2017с. Дьокуускай куорат
Ответов 14 Написать ответ
  • -Мила
    13 ноября  

    Бүгүн, Сэтинньи уон үс күнүгэр Саха Сирин Бастакы Президенэ Михаил Николаев төрөөбүт күнэ! Кини 1937 сыллааха Хаҥалас улууһун Өктөм нэһилэгэр күн сирин көрбүтэ. Сүүрбэ биэс сыл аннараа өттүгэр Саха Сирин Бастакы Президена буолан баран дьонун сэргэтин иннигэр туох үтүөүнү-өҥөнү оҥорбутун кылгастык бэлиэтээтэххэ маннык:1) Саха Сирин судаарыстыбаннаһын, бас билиитин хаһан даҕаны буолбатах үрдүк таһымҥа таһаарбыта, 2) Саха Сирин олоҕор аан бастаан Россия салайааччытын аҕалан сахалар хайдах дьаһанан олороллорун көрдөрөн, кэпсээн, туруорсан суверенитет ыларга сөптөөх дьон диэн дакаастаабыта. 3) Үөрэхтээһини, доруобуйа харыстабылын, чөл олоҕу хаһан даҕаны буола илик үрдүк таһымҥа таһаарбыта суолта биэрбитэ.  4) Россия историятыгар аан бастаан, Россия субъегын баһылыга  Бүтүн Россия аатыттан омук дойдутун кытта экономическай, культурнай ситим туһунан илии баттаабыта (Соҕуруу Корея, 1995 с.). Ити курдук тас дойдулары кытта эргиэн, үөрэх, наука, культура сыһыаннара ол иннинэ хаһан да көстүбэтэх таһымҥа тахсан Сахалар киэҥ аартыкка тахсыбыттара. 5) Аан Дойдуга аан бастаан оҕо спордугар Азия Оҕолоро мустан күрэхтэспиттэрэ, бэйэ бэйэни кытта билсибитэрэ. Ол иннинэ "Азия Оҕолоро" курдук улахан тэрээһини сахалар тус бэйэлэрэ ыыта иликтэрэ, итини куоһарар тэрээһин ыытыллара да биллибэт. 6) Россия историятыгар аан бастаан Бырабыыталыстыба норуот иннигэр үлэтин оччуотуурун киллэрбитэ (1998 с). Билигин бүтүн Россия үрдүнэн итинник оччуотар ыытыллыллыахтаахтар диэн Кремль быһааран олорор.  7) Аан Дойду историятыгар аан бастаан сүҥкэл улахан сирдэри тыытыллыбат, "Ытык Кэрэ" сирдэринэн ааҕан киһи аймах иннигэр улахан үтүөнү оҥорбута. 8)  Россия историятыгар аан бастаан искусствоҕа дьоҕурдаах оҕолору мунньан  "Высшая Школа Музыки" тэрийэн саха дьонун үтүө-кэрэ эйгэтигэр дьоҕурдааҕын, Аан Дойду улуу омуктарыттан туох да итэҕэһэ суоҕун бээбитигэр да атын дьоҥҥо да арылыччы көрдөрбүтэ. 9) Бастакынан "Ыччат сыла", "Арктика сыла" уо.д.а. сыллар бигэргэтиллэн ити хайысхаларга сүҥкэл элбэх үлэ ыытыллан судаарыстыба, дьон сэргэ күүһэ түмүллүбүтэ. 10) Энчирийбэт, бигэ, эрэллээх дьаһалларынан Саха Сирэ Россияны кытта үйэ саас тухары бииргэ буолар, эрэллээх,бэйэтэ бэйэтин дьаһаныан сөп дойду, сахалар үлэһит, таланнаах дьон диэн көрдөрөн дьоно сэргэтэ салгыы сайдарыгар огдолуйбат олук, кэхтибэт кэскил олохтообута. Михаил Николаев билигин даҕаны үлэ үөһүгэр сылдьар. Онон  сахалар биир баар суох киэн туттар киһибитигэр Алроса алмааһын курдук кытаанах доруобуйаны, Ытык Кэрэ сирдэр курдук кэрэ олоҕу, Азия Оҕолорун курдук эрчимнээх сырыыны
    баҕарыаххайын!

    1
  • trofim_trofimov
    trofim_trofimov
    Пробокс
    Ветеран
    13 ноября  

    Саха кыра-хара омугу харыстыыр аналлаах , айыллан бу орто дойдуга тёлкёлёммут куннунэн!

    0
  • НкТ.
    13 ноября  

    Эъэрдэ,уруй-айхал Михаил Ефимовичка.

    0
  • BorNEo
    BorNEo
    Николай Борисов
    Ветеран
    13 ноября  

    Эҕэрдэлэргэ кыттыһабынraised fist

    0
  • ext_fb_238059456726981tECl6
    13 ноября  

    Дьолу соргуну, уһун дьоллоох олоҕу

    0
  • Саргыда
    Саргыда
    Ветеран
    13 ноября  

    КҮННЭЭХ БЫЛААХ
    Бастакы Бэрэсидьиэҥҥэ

    Күннээх халлаан лоскуйун
    Мин илиибэр ылабын,
    Сахам ыра санаатын
    Түөспэр ыга тутабын.

    Айыым сирин үрдүнэн
    Алгыс аман күүһүнэн
    Киирбэт күнү дьүһүйбүт
    Килбиэн кэми өйдүүбүн:

    Күнтэн эрэ тэһииннээх
    Күн улууһа буоларга
    Күннээх былаах ыҥыра
    Күлүмүрдээн кэлбитэ.

    Хара былыт халыйбат,
    Хаардаах самыыр баһыйбат
    Халлаан унаар урсуннаах
    Хаарыан кэмэ күүппүтэ!

    Ыра санаа - ытык сирдьит
    Ырааҕы да чугаһаппыт,
    Көҥүллэммэт Көҥүл кэрэ
    Ырыаларын ыллаппыт...
    САЙА

    0
  • Курулгэн
    13 ноября  

    САХА сирин бастакы президеныгар Михаил Ефимовичка- уруй- эгэрдэ!
    УБААСТАБЫЛ!!!

    0
  • Петров Дмитрий
    13 ноября  

    Михаил Ефимович,кытаанах,чэгиэн олоҕу,Эн баар буолаҥҥын,Саха норуотун хараҕын аһан Аан Дойду биллэ-Уһук Хоту олорор норуоттары.
    Өссө да үтүө сүбэҕинэн,өркөн өйгүнэн
    Норуоккун үөрдэ тураргар.

    0
  • BorNEo
    BorNEo
    Николай Борисов
    Ветеран
    13 ноября  

    Саха24-кэ Михаил Ефимович туһунан бэртээхэй киинэ кэлэ турар.

    0
  • RchimN
    RchimN
    Ветеран
    13 ноября  

    Улуу киһини уруйдуубун! Үбүлүөйүнэн эҕэрдэлэргэ кыттыһабын!

    0
  • observer_ykt
    14 ноября  

    Михаил Ефимовиhы мин эмиэ үбүлүөйүнэн э5эрдэлиибин!

    Ба5арабын дьолу соргуну, уһун дьоллоох олоҕу бэйэтигэр уонна дьиэ кэргэнигэр.
    Уруй-айхал буоллун саха норуотун улуу киhитигэр Михаил Ефимовичка!

    0
Ответ на тему: Үбүлүөйгүнэн, Михаил Ефимович!
Введите код с картинки*:  Кликните на картинку, чтобы обновить код
grinning face grinning face with smiling eyes face with tears of joy smiling face with open mouth smiling face with open mouth and smiling eyes smiling face with open mouth and cold sweat smiling face with open mouth and tightly-closed eyes smiling face with halo smiling face with horns winking face smiling face with smiling eyes face savouring delicious food relieved face smiling face with heart-shaped eyes smiling face with sunglasses smirking face neutral face expressionless face unamused face face with cold sweat pensive face confused face confounded face kissing face face throwing a kiss kissing face with smiling eyes kissing face with closed eyes face with stuck-out tongue face with stuck-out tongue and winking eye face with stuck-out tongue and tightly-closed eyes disappointed face angry face pouting face crying face persevering face face with look of triumph disappointed but relieved face frowning face with open mouth anguished face fearful face weary face sleepy face tired face grimacing face loudly crying face face with open mouth face with open mouth and cold sweat face screaming in fear astonished face flushed face sleeping face dizzy face face without mouth face with medical mask face with no good gesture face with ok gesture person bowing deeply person with folded hands raised fist raised hand victory hand white up pointing index fisted hand sign waving hand sign ok hand sign thumbs up sign thumbs down sign clapping hands sign open hands sign flexed biceps
  
Предложения и замечания