3 года на форуме Топ пользователь 1000 просмотров Все
Награды
3 года на форуме
3 года на форуме
Топ пользователь
Топ пользователь
1000 просмотров
1000 просмотров
хоһуйуу
  2751
Туоххаһыйан дууһам ытаатаҕына
Талаһабын ким да суох сиригэр.
Күлүк түһэн мичээрим сүттэҕинэ
Күрүүбүн күн көрбөт өттүгэр.
Соҕотоҕун хаалан тохтуу түһэн
Санаам сааскыларын кэрийэбин.
Сыллар быыстарыгар саһан хаалбыт
Сэгэрбин булан сэмээр үөрэбин.
Хабыс-хараҥаҕа олороммун
Ааспыт олоҕум сырдык сороҕун
Түмэ тардан чүмэчи оҥостон
Тулалыыр хараҥаны кыйдыыбын.

(с) Raisa Sogda
Ответов 27 Написать ответ
  • Алексеевна5
    18 сентября 2015  

    .

    Биир дьиэҕэ олоробут,
    Биир киинэни көрөбүт,
    Биир иһиттэн аһыыбыт,
    Биир ороҥҥо сытабыт...

    Уонна дьэ, тоҕо, тоҕо
    Адьас атын дьоммутуй?
    Өйдөһүү суох буолбутун
    Ону дьэ, хайыыбытый?

    Икки сүрэҕи холбуур,
    Саҥа дьиэни олохтуур
    Көстүбэт күндү ситим -
    Көмүс утах - бүппүт дии.

    Кымыһа бүппүт чороон
    Хатан хайыта барыа.
    Кураанах буолбут хороон:
    Уота суох олох - буруо...

    (с) Raisa Sogda

    0
  • Алексеевна5
    18 сентября 2015  

    .


    Чугас киһигэр уордайыма

    Чугас киһигэр уордайыма,
    Арахсыы төрүөтүн бэлэхтээмэ,
    Тымныы кырыанан хаарыйыма,
    Кэрэ бэйэтин кэҕиннэримэ,

    Чараас солко дууһатын
    Холус илиигинэн имитимэ,
    Тууйан-хаайан ыксатан,
    Харах уутун ыган таһаарыма,

    Туһата суох таах сураҕы
    Таабырыннаама, итэҕэйимэ,
    Таптыыр аналлаах сүрэҕи
    Туһахха иҥиннэрэн хаайыма.

    Аһыныый даа, чугас киһигин,
    Айыыһыт биэрбитин кылгатыма.
    Өҥөйүөҥ дии, доҕорун иинин...
    Өр хараастаргын чугаһатыма.

    (с) Raisa Sogda

    0
  • Алексеевна5
    18 сентября 2015  

    Лирика

    Күһүҥҥү этюд

    Күн көмүс киистэтин
    Бүтэһик үҥкүүтэ
    Араҥас өҥүнэн
    Алааһы эргиччи
    Маһы-оту кэриччи
    Кэрэтик киэргэппит.
    Хара тиит мастарга
    Саһарҕа саккырыыр
    Синньигэс ирбинньик
    Сиэттиһэ иилиспит.
    Лаглаҕар хатыҥҥа
    Лабаатын аайытын
    Сандаархай саһарҕа
    Толбоно ыйаммыт.
    Бээгэйкээн иирэҕэ,
    Намыһах талахха
    Кырааска тобоҕо -
    Көмүсчэй бытархай -
    Таммалыы тохтубут.
    Харыйаҕа, бэскэ
    От күөҕэ сүппэккэ,
    Түгэхтээх күлүгэ
    Күһүҥҥү көстүүнү
    Дьиктитик ситэрбит.
    ...
    (с) Raisa Sogda

    0
  • Алексеевна5
    18 сентября 2015  

    Лирика

    * * *
    Халлааны тэһэ кэйэн
    Тырымныыр сулустар
    Киэҥ куйаар эһиэкэйин
    Тардыбыт курдуктар.

    Эриллэр Галактика
    Ол бүппэт эһиэкэйэ
    Иһиллэр дуу кулгаахпар
    Үрүҥ хаартан тэйэн...

    Абылыыр күүскэ бэринэн
    Өөр-өр турдум иһийэн...
    Сиргэ түстэ эһиэкэй
    Үрүҥ хаары ытыйан...

    (с) Raisa Sogda

    0
  • Алексеевна5
    25 сентября 2015  

    .


    Уулаах отон

    Үрүҥ түүн үтүрүллүүтэ,
    Үрүмэ сайын бүтүүтэ
    Халыҥ тайҕам быыһыгар,
    Хааман сиппэт иэнигэр
    Сир сиигэ ыгыллан тахсан,
    Күн кыырпаҕын иҥэринэн
    Кып-кыһыл таммах буолан
    Күөх көбүөргэ ыһыллар.

    Күнү быһа төҥкөйөммүн
    Сирбэр бокулуон уурабын,
    Күндү таммаҕы хомуйаммын
    Туос ыаҕайаны толоробун...

    Кыһын, маҥан хаар ортото
    Кып-кыһыл отону ылыам,
    Ытыспар бигээн тутан
    Ахтылҕаммын таһаарыам.

    Отой да охтор кэмнэрбэр
    Отон утаҕын уймахтыам.
    Сирим сиигин истэрбин
    Сиҥнэн иһэн уйуттуом...
    ...
    (с) Raisa Sogda

    0
  • Алексеевна5
    5 октября 2015  

    .


    Хаар кыырпаҕа

    Тунал хаар кыыдамыгар
    Тоһуйа илиибин ууммуппар
    Кыракый хаар кыырпаҕа
    Ытыспар аргыый сыһынна.
    Уонна...
    Тапталым суоһуттан уулунна.
    Ол онтон хараҕым ууланна.
    ...
    (с) Raisa Sogda

    0
  • Алексеевна5
    26 октября 2015  

    *


    * * *
    Кутаа уота
    Кыымы ыста...

    Күммүт киирэн
    Күлүм уотун
    Бытарыс гынан
    Былыкка ыста.
    Баһаам үгүс
    Тырым сулус
    Хараҥа курдат
    Тэһитэ тыкта...

    * * *
    (с) Raisa Sogda

    0
  • Алексеевна5
    26 октября 2015  

    *

    * * *

    Дьикти да түүл...

    Бүгүн иһиттим
    Имэрийэр кэриэтэ
    Намыын да саҥаны:
    Өр кэтэспити эттэ
    Ону тэҥэ саҥаны.
    Бүттүүн иһийдим,
    Бэркиһээтим бэйэм-
    Сэгэрим эппитэ
    Сулустартан тэйэн
    Дьэ миэхэ кэлбитэ.

    Чуумпу да түүн...

    * * *

    (с) Raisa Sogda

    0
  • Алексеевна5
    21 января 2016  

    .


    * * *

    Мин эдэр этим.
    Оҕотук нарын сүрэхтээҕим,
    Эн сааһыран эрэрин,
    Оҕолооҕун, кэргэннээҕин.

    Олоххор табыллыбакка,
    Эмискэ, "кэргэн кэл" диэбитиҥ.
    Тапталы таайтаран эппэккэ
    Туҥуй сүрэхпин үргүппүтүҥ...

    Оо, онтон элбэх сайын ааста.
    Кэргэннээхпин, оҕолоохпун.
    Тапталы таба тайаммакка,
    Хатылаатым эн олоххун.

    Дьэ кэлэн, аҕынным эйиигин:
    Өрүү өйдөөн кэлэбин эппиккин.
    "Өйөһөн олоруох" диэтэргин
    Билигин сөбүлэһиэ эбиппин...


    (с) Raisa Sogda

    0
  • Алексеевна5
    29 января 2016  

    .


    Умнуллубат урукку тапталыам!

    Умнуллубат урукку тапталыам!
    Көтөн ааһар күннэр күлүнэн да көмтөллөр
    Умаппыт уотун сылааһа сүппэтиэн.
    Эмчит бириэмэ эмин да истэрбин
    Эмискэ сүрэх ыарыыта буолан көптөххүөн.
    Чиэски сиринэн тэйэ да сырыттаргын
    Чараас уобарас уулла сууруллубатыан.
    Чолбон сулустуу ырааппыт ырыа тоҕо
    Чуумпу уубун уйгуурдан уһугуннардыан?

    Умнуллубат уоспат урукку тапталыам,
    Ханнык сулус анныгар олохсуйдуон?
    Хайа биллибэт дьахтар дьоллоох анала,
    Хас оҕо амарах аҕата буоллуон?
    Сүрэххэр сүппүппүн-сүппэтэхпин биллэрбиэн,
    Хаарыаны, кыл түгэнэ көрөн ылларбыан,
    Көрдөрбөккө эрэ эмэҕирэн эрэрбин
    Күндү эдэр мөссүөммүн үргүппэтэрбиэн...

    (с) Raisa Sogda

    0
  • Алексеевна5
    21 июля 2016  

    .

    .
    Толук

    Сүрэҕим хоргутта, хомойдо, ытаата -
    Олоҕум кэрдииһэ сөкүүндэ кылгаата.
    Оттон мин кыыһырдым, ыксааммын үөҕүстүм -
    Атын олох сөкүүндэтин ыйыһынным...

    Айылҕа Аан дайдыны айыан саҕаттан
    Олоҕу салҕаары олорор ааттаахпыт.
    Оччоҕо тоҕотун оҕотук эрдэхтэн
    Куруубай хааммытын хамсата оонньуубут?

    Эрэйэр дуу эргийэр Эдьиий Эйгэбит
    Күнү кылап гына көрбүт иэспитигэр
    Оччугуй олохпут күндү кыырамтатын
    Күннэтэ кырыйсан толук биэрэрбитин?..

    (с) Raisa Sogda

    0
  • Алексеевна5
    21 июля 2016  

    .

    * * *

    Ааспат ахтылҕаным
    Аһыыта-кутуута
    Сүрэхпэр көймөстөн
    Күүгэннирэ үллэн
    Харах уута буолан
    Таммалыы тоҕунна

    * * *

    0
  • Алексеевна5
    21 июля 2016  

    .


    * * *

    Сэбирдэххэ саһан
    Силлиэ тыал ыйылыыр...
    Ити мин дууһам
    Эйиигин сайыһан
    Эймэнийэ ытыыр...

    * * *

    0
  • алексеевна5
    21 ноября 2016  

    *

    .
    Кыһыҥҥы түннүк
    * * *
    Дьиэ сибэккитин күөх сэбирдэҕин
    Кыһыҥҥы түннүк сонньуйа көрөр.
    Сиигирбит килэгир хараҕыттан
    Сырдык таммах сыыйылла тохтор.
    Кыһыҥҥы түннүк сайыны ахтар:
    Мууһа ууллан чэмэлийэ сырдыан,
    Күөх сирэми, сибэккини көрүөн,
    Күн күлүмүнэн оонньуон баҕарар.
    Ол баҕата түүл буолан түүн туолар-
    Түннүк бүтүннүү кырыаран хаалар.
    Ахтылҕанын көмүс киистэтэ
    Дьикти сайын оһуорун түһэрэр...

    (с) Raisa Sogda

    0
  • ну
    15 марта 2017  

    Еще

    0
  • Алексеевна5
    11 апреля  

    .
    * * *
    Аҕырыа саҕа харахпар
    Аҕыс уон араас өртүнэн
    Оонньуур дии тулам барыта.
    Аанньал кыната - кыламан
    Аа-дьуо сапсыннар даҕаны
    Сыыдам дии айанньыт харах!
    Сүрэх чопчутун оҕобун
    Сылааһынан имэрийэр
    Сымнаҕас харалта-харах.
    Араас эгэлгэни көрөр,
    Кэрэ сибэккигэ түһэр,
    Кэрэхсиир сөҕөр лыах-харах!
    Үөһээттэн да үөһээ көтөр
    Куйаары курдуур кэриэтэ
    Кыракый планета-харах!
    Тырым сулустары тиһэр,
    Чолбон чаҕылын иилинэр
    Түгэҕэ суох дириҥ харах...
    Оонньуур дии тулам барыта
    Аҕыс уон араас өҥүнэн
    Аҕырыа саҕа харахпар...
    ... ... ...
    (с) Raisa Sogda

    0
  • Алексеевна5
    11 апреля  

    .
    * * *
    Туора киһини тумна көрө
    Кынчарыйа үөрэммит хараҕым
    Тоҕо сымнаата бу бүгүн?
    Билбэт эр киһиттэн сэрэнэн
    Эрдэттэн чугуйар сүрэҕим
    Эмискэ тэптэҕин күүһүн!
    Кырыа кыырпаҕы бүрүнэн
    Кыраҕа кыһаммат бэйэм
    Туохтан долгуйдум бу маннык?
    Сымнатта... ааһан иһэн
    Сылаас тылы эппитин.
    Долгутта... тохтуу түһэн
    Тобулу көрөн ылбытыҥ.
    Уулларда... алҕаска дуу
    Тарбахпын таарыйан ааспытын...
    ... ... ...
    (с) Raisa Sogda

    0
  • Алексеевна5
    11 апреля  

    .
    * * *
    Сыал

    Тыала да суохха илибириир
    Тэтиҥ мас сэбирдэҕин курдук
    Салҕалас сэлибирэс илии
    Саа чыыбыһын сатаан да таттар
    Сыалы таппат, сыыһа ытар.
    .
    Уҥа-хаҥас ыстаҥалаан,
    Соһуччу түһэр тыал тэҥэ
    Олоҕо суох оҕотук санаа
    Төһө да күүскэ мөҕүстэр
    Сыалын сиппэт, эрдэ эстэр.
    .
    Ыйыллаҕас кыраҕы харах,
    Ыгыллыбат холку сүрэх,
    Ыксаабат кытаанах илии
    Ыраах да сыалы таба ытыа.
    Ырааҕы ырыҥалыыр кыахтаах,
    Чаҕылхай ыра кынаттаах,
    Үгэскэ оруннаах санаа
    Үгүһү, үрдүгү ситиһиэ.
    ... ... ...
    (с) Raisa Sogda

    0
  • Алексеевна5
    11 апреля  

    .
    * * *
    Ааспыт кэм

    Ааспыт кэм айдаана-аймалҕана,
    Алдьатыылаах араллааннара
    Адьас арахсыспат күлүктүү
    Арыаллыыллар бүгүҥҥү күнү.
    .
    Ааспыт кэм ыарахан ыарыылара,
    Аҥайа оспут баастара
    Дьарҕа буолан сатыылыыллар,
    Дьөлө кэйэн самнара сатыыллар.
    .
    Ааспыт кэм эрэйдэрэ-муҥнара
    Эриэн ситиилии эриллэҥнээн
    Кэдэгэр иэммитин хастыыллар,
    Элбэхтик ээхпитин этитэллэр.
    .
    Ааспыт кэм аньыытын амтана
    Курбуу чыпчахайын уот аһыыта
    Тымныы ииҥҥэ да үтүрүйүө -
    Тыйыстык туттан утары көрүөх.
    .
    Ааспыт кэмэ суох билиҥҥи суох,
    Аҥала да ону ырыҥалыыр.
    Арай "тасты өйдөөхтөр", биһиги,
    Аанньа ахтыбаппыт сүрүн ньии...
    .
    Ааспыт кэмниин үөс тымырынан
    Санаабыт эргиирэ ситимнээх.
    Ааспыты тамныыр кырыыс тылынан -
    Тымыры быһа соппукка тэҥнээх.
    ... ... ...
    (с) Raisa Sogda

    0
  • Алексеевна5
    12 апреля  

    .
    * * *
    Көҥүл санаа
    .
    Көҥүл санаа
    Көстүбэт күүһэ
    Көмүөл мууһунуу
    Көҥү анньан
    Өйүм түрмэтин
    Көтүрү түстэ.
    Көрөр далым
    Өһүлү баран
    Көрбөтөх сиринэн
    Көччүйэ көттө.
    Көмнөҕө түһэн
    Көҕүлүм чэпчээн
    Көнньүөр үөрүүнэн
    Көхсүм туолла.
    Санаам баайыыта
    Быһа ыстанан
    Бопсуута суох
    Босхо дайда.
    Бөҕүөрбүт тылым
    Бүөлээн сыппыт
    Бүөтэ аһыллан
    Үөрэ ыллаатым
    Үөһээ тыынным,
    Күп-күөх далайга
    Көҥүллүк көттүм!
    ... ... ...
    (с) Raisa Sogda
    .
    Бу хоһоонум биир тыынынан суруллубута.
    Көҥүл кэм кэллэ диэн үөрүүттэн.
    "Сахаада" хаһыакка 1991с. бэчээттэммитэ

    0
  • Алексеевна5
    12 апреля  

    .
    * * *
    Куорат дьиэлэрэ
    .
    Кыракый чыычаах буоламмын
    Күнү кытары сырсыһан,
    Куорат үрдүнэн көтөбүн,
    Кыырай үрдүктэн көрөбүн:
    Мрамор былааччыйалаах
    Мааны хотун дьиэлэр,
    Кыһыл гранит көстүүмнээх
    Кындыа тойон дьиэлэр
    Киин болуоссат ортотугар
    Курустаал ууну ыһыахтыыр
    Кырыылаах фонтаны тула
    Көргө кэлбиттэр ыһыахтыы.
    Кинилэр кэннилэригэр
    Кырдьаҕас эргэ мас дьиэлэр
    Көргө-нарга кыттыспакка
    Көйгөтүллэн самнаспыттар.
    Хоту, арҕаа онон-манан
    Хороспут дьорҕоот уолаттар -
    Хоруопка игирэ дьиэлэр
    Халлааны мыҥаан тураллар.
    Саргылаах алгыс тылынан
    Саха аймаҕы салҕаабыт,
    Сайсары алаһа уотун
    Сойбут олоҕун оннугар,
    Адьас хаалбыттар умнууга
    Эргэрбит эмээхсин дьиэлэр,
    Сытыйбыт сымардаах ууга
    Күлүктэрин көрүнэллэр...
    Куорат дьиэлэрэ сиэттиһэн
    Эһиэкэй этиэхтэрэ дуо,
    "Эн-мин" дэспэккэ, биир тэҥник
    Дьиэрэҥкэй тэбиэхтэрэ дуо?!.
    .
    (с) Raisa Sogda
    Бу хоһоону 1991с суруйбутум.
    1992с "Чолбон" сурунаалга бэчээттэммитэ

    0
  • Алексеевна5
    12 апреля  

    .
    * * *
    Түүҥҥү хараҥа
    .
    Ыт уйатыныы
    Кыараҕас хоспор
    Ытыс таһынар
    Ыас хараҥа түүн
    Сыбдыйан киирэн
    Сытынан кээстэ:
    Уһаан, тэнийэн
    Уһугу булла,
    Хойдон, халыйан
    Муннукка туолла.
    Чугаһаан кэлэн
    Тулабын кууста -
    Хойуу хараҥа
    Биһиккэ сытан
    Устар курдукпун...
    Тунааран көстөр
    Түннүкпэр арай
    Сырдык кыырпаҕа
    Сулус умайар,
    Ыраас ырабар
    Ыраах угуйар...
    ... ... ...
    (с) Raisa Sogda
    Бу хоһоону 1991с суруйбутум.
    1992с "Чолбон" сурунаалга бэчээттэммитэ

    0
  • Алексеевна5
    12 апреля  

    .
    Күһүҥҥү түүн
    .
    Ааһар күн арҕаа төкүнүйдэ -
    Көмүс суһуоҕун сүүс сүмэҕин
    Сыыйа тардан саҕахха сүттэ -
    Күнүскү суола симэлийдэ.
    .
    Сир күнү сайыһан ытаата:
    Хараҕын уута - сиик тоҕунна.
    Халлаан аһынан чугаһаата,
    Сааратан сулустарын уунна.
    .
    Сирбит уоскуйан үөһээ тыынна,
    Баата чуумпуну сыттыктанна,
    Баархат хараҥанан сабынна,
    Халлааҥҥа бигэтэн утуйда...
    ... ... ...
    (с) Raisa Sogda
    Бу хоһоону 1991с суруйбутум.
    1992с "Чолбон" сурунаалга бэчээттэммитэ

    Кстати, саамай астынар хоһоонум )))

    0
  • Алексеевна5
    12 апреля  

    .
    * * *
    "Кыбыкы"
    .
    "Кыбыкы" дэттэрэн,
    Куруубай соҕустук
    Кырдьыгын эттэрэн,
    Кыбыстан, хоргутан
    Кырдьа барбыт кыыс,
    Кутаа уоттан тэйэн
    Кумуллан турбута.
    Иннигэр эдэр саас
    Күлэр-үөрэр, оонньуур,
    Кутаа нөҥүө ойуолуур.
    Көҥүл санаа күүһэ,
    Кылгас күндү кэмэ
    Көрүлээн көччүйэр.
    Көхсүттэн кырдьар саас -
    Кытаанах күрүчүөк
    Кырыы диэки тардар,
    Кырыа тыына биллэр.
    Хараҥаҕа антах
    Кириэс-күлүк көстөр...
    Кырдьа барбыт кыыс
    Көрдөһөрдүү илиитин
    Кутаа диэки уунан
    Куотуохтуу көппүт
    Кыымы тутан ылар -
    Кыымтан саҥа кутаа,
    Саҥа олох саҕыллыа...
    ... ... ...
    (с) Raisa Sogda
    Бу хоһоону 1991с суруйбутум.
    1992с "Чолбон" сурунаалга бэчээттэммитэ

    0
  • Алексеевна5
    12 апреля  

    .
    * * *
    Ыра санаам
    .
    Бүппэтэх үлэ,
    Күннээҕи түбүк
    Ситимиттэн сөллөн,
    Көрө суох күлүү,
    Көрүнньүк буолуу
    Көҕөтүттэн туллан,
    Кыра кыһалҕа,
    Кураанах санаа
    Кутатыттан куотан
    Айар айылгы
    Атыгар олорсон
    Айаннаан ылар
    Аналлаах буолуум.
    Ойуулуур сурук
    Ордуктан ордук
    Оһуорун анньар
    Оҥоһуулаах буолуум.
    Оо, оччоҕо мин
    Өйүм түгэҕэр
    Сүрэҕим сиэбигэр
    Күндү чөмчүүктүү
    Сөҥүөрэн сыппыт
    Ырыа-хоһоон
    Ыраас таммаҕын
    Ыган таһааран,
    Ыксары баайан,
    Ыпсары тардан,
    Ыһыахха кэтэр
    Ытарҕа курдук
    Ылбаҕай гына,
    Айыы кийиитин
    Симэҕин курдук
    Сиэдэрэй гына
    Тиһэн түһэриэх этим.
    ... ... ...
    (с) Raisa Sogda
    "Сахаада" хаһыакка 1991с. бэчээттэммитэ.

    0
  • Алексеевна5
    12 апреля  

    .
    * * *
    Кумах курдук кутуллар
    Кураанах тылтан сылайдым.
    Курус тыаллыы субуллар
    Кур сыһыантан курсуйдум.
    .
    Кырылас кумах быыһыгар
    Күндү тыл күлүмүн көрдөрбүн.
    Саатар биирдэ сай ыһыаҕар
    Сымнаҕас илгэни истэрбин.
    .
    Тиһиэм харахпар ол күлүмү
    Тулалыыр олохпун сырдата.
    Ибиириэм илгэнэн күһүнү
    Сайыҥҥы сылааһы уһата.
    ... ... ...
    (с) Raisa Sogda

    0
  • Алексеевна5
    8 мая  

    пишите комменты )

    0
Ответ на тему: хоһуйуу
Введите код с картинки*:  Кликните на картинку, чтобы обновить код
grinning face grinning face with smiling eyes face with tears of joy smiling face with open mouth smiling face with open mouth and smiling eyes smiling face with open mouth and cold sweat smiling face with open mouth and tightly-closed eyes smiling face with halo smiling face with horns winking face smiling face with smiling eyes face savouring delicious food relieved face smiling face with heart-shaped eyes smiling face with sunglasses smirking face neutral face expressionless face unamused face face with cold sweat pensive face confused face confounded face kissing face face throwing a kiss kissing face with smiling eyes kissing face with closed eyes face with stuck-out tongue face with stuck-out tongue and winking eye face with stuck-out tongue and tightly-closed eyes disappointed face angry face pouting face crying face persevering face face with look of triumph disappointed but relieved face frowning face with open mouth anguished face fearful face weary face sleepy face tired face grimacing face loudly crying face face with open mouth face with open mouth and cold sweat face screaming in fear astonished face flushed face sleeping face dizzy face face without mouth face with medical mask face with no good gesture face with ok gesture person bowing deeply person with folded hands raised fist raised hand victory hand white up pointing index fisted hand sign waving hand sign ok hand sign thumbs up sign thumbs down sign clapping hands sign open hands sign flexed biceps
  
Предложения и замечания